Deputat korrupsiya barədə məlumat verənlərin qınanmasına qarşı çıxıb

Deputat Bəhruz Məhərrəmov korrupsiya halları barədə məlumat verən şəxslərə qarşı sosial mediada və digər resurslarda hücumların ifşa olunmasını təklif edib. O, belə şəxslərin cəmiyyət tərəfindən qınanmasının korrupsiyaya ortaq olmaq kimi qiymətləndirilməli olduğunu deyib.

“Korrupsiya ilə bağlı məlumat verən şəxsin hansısa formada qınağa cəlb edilməsi özlüyündə korrupsiyaya, cinayətə ortaq olmaq deməkdir”, - Məhərrəmov korrupsiya ilə bağlı hüquqpozmalar barədə məlumat verən şəxslərin müdafiəsi və həvəsləndirilməsi haqqında qanun layihəsinin müzakirəsində bildirib.

Deputat medianı bu mövzuda “hay-küy dalınca yox”, məlumat verən şəxslərin ifşasına yönələn prosesə dəstək verməyə və cəmiyyəti bu istiqamətdə maarifləndirməyə çağırıb.

O, həmin şəxslərin sosial mediada və digər platformalarda hücumlara məruz qala biləcəyini deyərək, bu halların ifşa olunmasının insanların məlumat verməkdən çəkinməməsi üçün vacib olduğunu vurğulayıb.

Məhərrəmov qanun layihəsini digər hüquqpozmalar barədə məlumat verməyi təşviq edən mexanizmlərin yaradılması üçün də başlanğıc hesab etdiyini bildirib. Onun təklifinə görə, gələcəkdə vətəndaşlar yol hərəkəti qaydalarının pozulması kimi halları video ilə qeydə alıb aidiyyəti qurumlara göndərə bilər.
“Vətəndaş özü ictimai nizamın, ictimai sabitliyin qoruyucusuna çevrilə bilər. Təbii ki, müəyyən həddə, normalar daxilində və xoşagəlməz hallara yol vermədən”, – deyə deputat bildirib.

Gülnar Nazimqızı