İstanbulda məktəbə hücum edən şagird 1 nəfəri öldürüb, 7 nəfəri yaralayıb

İstanbulun Başakşehir rayonunda məktəbdə baş verən bıçaqlı hücum nəticəsində 10 yaşlı şagird ölüb, 7 şagirdin müalicəsi davam edir.

Hadisə Kayabaşı məhəlləsində yerləşən Şeyx Şamil İmam Hatip Orta Məktəbində baş verib. Hücumun başqa məktəbdə təhsil alan 10-cu sinif şagirdi F.M. tərəfindən törədildiyi bildirilib.

İstanbul valisi Davut Gülün sözlərinə görə, hücum edən qız şagird həmin məhəllədə yaşayır və məktəbə yaxın ərazidə məskunlaşıb. O, məktəbə forma ilə daxil olaraq şagirdləri hədəf seçmədən bıçaqlayıb.

İnsidentdən sonra əraziyə polis və təcili tibbi yardım briqadaları cəlb olunub.

Türkiyənin Milli Təhsil naziri Yusuf Tekin vəziyyəti kritik olan şagirdin öldüyünü açıqlayıb. Daxili İşlər Nazirliyi isə ölən şagirdin 10 yaşlı Eslem Sare Bulut olduğunu bildirib.

Səhiyyə naziri Kemal Memişoğlu daha əvvəl hücum nəticəsində 8 şagirdin yaralandığını, onlardan birinin vəziyyətinin kritik, ikisinin vəziyyətinin orta-ağır olduğunu açıqlamışdı. Hazırda 7 şagirdin xəstəxanada müalicəsinin davam etdiyi bildirilib.

Hadisədən sonra məktəbdə bu gün və sabah tədrisə fasilə verilib. Hadisənin araşdırılması üçün iki müfəttişin təyin edildiyi, hücumu törədən şagirdin isə günorta saatlarında saxlanıldığı qeyd olunub.

Türkiyə Daxili İşlər Nazirliyi bildirib ki, oxşar hadisələrin təkrarlanmaması üçün məktəblərdə və məktəb ətrafında təhlükəsizlik tədbirləri yenidən nəzərdən keçirilir və əlavə tədbirlərlə bağlı iş aparılır.

Gülnar Nazimqızı