Adı mətbuatda hallanan lisey direktoru istefa verib

Bakı şəhəri Tərlan Heybətov adına “Vətən” idman liseyinin direktoru Tərminə Əsədova ilə bağlanmış əmək müqaviləsinə işçinin təşəbbüsü ilə xitam verilib. Bu barədə anews.az-ın əldə etdiyi məlumatda qeyd olunub. 

Müqaviləyə Azərbaycan Respublikası Əmək Məcəlləsinin 68-ci maddəsinin 2-ci hissəsinin “a” bəndi əsasında xitam verilib. Həmin bənd əmək müqaviləsinin işçinin təşəbbüsü ilə dayandırılmasını nəzərdə tutur.

Əsədovanın adı bu ilin avqustunda liseydə müəllimin valideyndən pul alması ilə bağlı yayılan media materiallarında da çəkilib.

Bəzi saytlarında dərc olunan yazılarda liseyin müəllimi Pünhan Pənahovun məzunlardan birinin valideynindən Dövlət İdman Akademiyasına qəbul imtahanı ilə bağlı kömək vədi qarşılığında 5 500 manat aldığı iddia olunub. Həmin yazılarda Pənahovun Əsədovaya arxalandığı və məsələnin hüquq-mühafizə orqanları tərəfindən araşdırıldığı bildirilib.

Əsədova daha əvvəl 126 saylı məktəbin direktoru olarkən də mətbuatda işıqlandırılıb. 2019-cu ildə yayımlanan xəbərdə həmin məktəbin ibtidai sinif şagirdlərinin qonşu 244 saylı məktəbə köçürülməsi ilə bağlı sakinlərin narahatlığı və direktorun məsələni şərh etməkdən imtina etməsi qeyd olunub. Bakı Şəhəri üzrə Təhsil İdarəsi isə ibtidai siniflərin köçürüldüyünü və məktəbin bazasında “Vətən” idman liseyinin yaradıldığını bildirmişdi.

Gülnar Nazimqızı