Rüfət Əliyev: HTBİ-də 328 itkin şəxsin genetik identifikasiyası aparılıb

Hazırda Hərbi Tibbi-Bioloji İnstitutunda (HTBİ) 328 itkin düşmüş şəxsin genetik identifikasiyası həyata keçirilib. Bunu HTBİ-nin nümayəndəsi Rüfət Əliyev “İtkin düşmüş şəxslər üzrə Bakı Dialoqu çərçivəsində IV Beynəlxalq Konfrans”ın ikinci günündə keçirilən panel sessiyada bildirib.

Əliyev deyib ki, Genetik Araşdırmalar Mərkəzinin Əsir və itkin düşmüş, girov götürülmüş vətəndaşlarla əlaqədar Dövlət Komissiyası və digər aidiyyəti dövlət qurumları ilə əməkdaşlığında rəqəmsal transformasiya, müasir texnoloji cihaz və avadanlıqlardan istifadə tədqiqatların etibarlılığını və xidmət keyfiyyətini artırıb.

Onun sözlərinə görə, əldə edilən nəticələr itkin düşmüş şəxslərin axtarışı prosesinə ictimai etimadı daha da gücləndirib.

“Yeni nəsil DNT texnologiyaları genetik mütəxəssislərin bilik və bacarıqlarının yenilənməsini zəruri edir. Xüsusi təlimlər və davamlı peşəkar inkişaf həm fərdi, həm də təşkilati səviyyədə qarşıya əsas vəzifə kimi qoyulub”, - Əliyev bildirib.

O qeyd edib ki, HTBİ mütəxəssisləri Kipr, Avstraliya, Türkiyə, İsveçrə, Rumıniya, Niderland, eləcə də Azərbaycanın müxtəlif bölgələrində keçirilən beynəlxalq elmi konfrans və seminarlarda iştirak ediblər.

Əliyevin sözlərinə görə, HTBİ nümayəndələri bu ilin sentyabrında Türkiyənin Antalya şəhərində keçirilən “21-ci Beynəlxalq Məhkəmə Ekspertizası Günləri”ndə iştirak edib.

“80 müxtəlif universiteti təmsil edən alimlər və beynəlxalq ekspert icması ilə birlikdə DNT araşdırmalarının şəxsiyyətin müəyyənləşdirilməsindəki rolunu müzakirə etmişik”, - o deyib.

Rüfət Əliyev bildirib ki, tədbir çərçivəsində HTBİ nümayəndələri DNT əsaslı tədqiqatlarda yeni metodların tətbiqi və yeni nəsil texnoloji avadanlıqların iş prinsipləri barədə beynəlxalq mütəxəssislərlə fikir mübadiləsi aparıblar.

Aytac Zeynalova