Cəmilə Bayramova: Mürəkkəb genetik identifikasiya xüsusi yanaşma tələb edir

Uzun müddət torpaq altında qalmış və müxtəlif xarici təsirlərə məruz qalmış insan qalıqlarının genetik identifikasiyası zamanı mütəxəssislər bir sıra çətinliklərlə üzləşirlər. Bunu DTX-nin Hərbi Tibb Baş İdarəsinin Genetik Tədqiqatlar Mərkəzinin baş mütəxəssisi Cəmilə Bayramova deyib.

Onun sözlərinə görə, zaman keçdikcə sümük nümunələrində DNT-nin deqradasiyası baş verir. Torpağın xüsusiyyətləri, temperatur dəyişiklikləri və digər amillər genetik materialın keyfiyyətinə təsir göstərərək analiz prosesini çətinləşdirir. Belə nümunələrin tədqiqində müasir DNT texnologiyalarından və genetik analiz üsullarından istifadə edilir. Referens nümunələrin əldə olunması ilə bağlı çətinliklər yarandığı hallarda da mövcud imkanlardan maksimum istifadə olunaraq identifikasiya prosesi davam etdirilir.

Baş mütəxəssis bildirib ki, mürəkkəb nümunələrin araşdırılmasında mütəxəssislərin peşəkar hazırlığı, müasir elmi metodların tətbiqi və hər bir nümunəyə fərdi yanaşma mühüm əhəmiyyət daşıyır.

O vurğulayıb ki, bu yanaşmalar uzun müddət müxtəlif təsirlərə məruz qalmış insan qalıqlarının identifikasiyası zamanı yaranan çətinliklərin aradan qaldırılmasına imkan verir.

Aytac Zeynalova