Erkin Qədirli dövlət qulluqçularının elmi araşdırmalar üçün icazə alması tələbini müdafiə edib

Deputat Erkin Qədirli dövlət qulluqçularının elmi araşdırmalar aparması üçün icazə alınması tələbini müdafiə edərək, bu qaydanın qadağa deyil, dövlət qulluğunda neytrallıq və maraqlar toqquşması risklərini azaltmaq məqsədi daşıdığını açıqlayıb. 

“Bu, qadağa anlamına gəlmir”, - Qədirli Milli Məclisdə çıxışı zamanı deyib.

Onun sözlərinə görə, elmi fəaliyyət akademik azadlığı nəzərdə tutsa da, dövlət qulluqçusunun araşdırmaları vəzifə öhdəlikləri və dövlət qulluğunun neytrallığı ilə ziddiyyət yarada bilər.

Deputat dövlət qulluqçularının konfidensial məlumatlara çıxışının digər tədqiqatçılarla müqayisədə onlara üstünlük verə və qeyri-bərabər rəqabətə səbəb ola biləcəyini qeyd edib.

O, həmçinin rəhbər şəxslərin tabeliklərində olan əməkdaşların topladığı məlumat və təhlillərdən öz elmi işlərində istifadə etməsi riskinə diqqət çəkib.

Qədirli dövlət qulluqçusunun andının mətninə də münasibət bildirib. O, Konstitusiyaya əməl etməyin bütün vətəndaşların borcu olduğunu, “Azərbaycan Respublikasının mənafelərinə xidmət etməyin” isə dövlət qulluqçularına aid xüsusi öhdəlik olduğunu deyib.

Gülnar Nazimqızı