Azərbaycanda 2032-ci ilədək 8 QVt yaşıl enerji gücü yaradılacaq

Azərbaycanda 2032-ci ilədək ümumi gücü təxminən 8 QVt olan günəş və külək elektrik stansiyalarının yaradılması planlaşdırılır. Eyni zamanda, 2027-ci ilin sonunadək ümumi gücü 2 QVt olan 11 stansiyanın istismara verilməsi nəzərdə tutulur. Bu barədə energetika naziri Pərviz Şahbazov III Milli Rəqabət Forumunda bildirib.

Nazirin sözlərinə görə, energetika sektorunda rəqabət mühitinin inkişafı istiqamətində aparılan islahatlar çərçivəsində altı yeni qanun qəbul edilib.

"Enerji layihələrinə özəl investisiyaların 2 milyard dolları, dövlət investisiyalarının isə 600 milyon dolları ötəcəyi gözlənilir.  Çinin “Universal International Holdings Limited” şirkətinin inşa etdiyi 100 MVt gücündə Qobustan Günəş Elektrik Stansiyası istifadəyə verilib. Yerli investorlar da Cəbrayıl və Naxçıvanda ümumi gücü 150 MVt olan dörd stansiya layihəsini həyata keçirirlər",-nazir vurğulayıb.

Aytac