Media və Yayım Şurası Türkiyə mediasında Azərbaycanla bağlı yayılan iddialara münasibət bildirib

Türkiyənin bəzi media resurslarında Azərbaycanda hicabla əlaqədar kütləvi həbslərin başladığı və insanların bu səbəbdən ölkəni tərk etdiyi barədə yayılan məlumatlar təkzib edilib.Bu barədə Azərbaycan Respublikası Media və Yayım Şurasının açıqlamasında bildirilib.

Şura sözügedən iddiaları dini həssaslıqlardan istifadə etməklə ictimai rəyi manipulyasiya etməyə və Azərbaycan haqqında yanlış təsəvvür formalaşdırmağa yönəlmiş dezinformasiya nümunəsi kimi qiymətləndirib.

Açıqlamada qeyd olunub ki, ayrı-ayrı siyasi və ictimai şəxslərin bu cür məlumatların yayılmasında iştirakı, əsassız iddiaları təhqiramiz ifadələrlə təqdim etməsi onların ictimai məsuliyyətinə ziddir və auditoriyaya təsir imkanlarından sui-istifadədir.

Media və Yayım Şurası ölkə haqqında saxta məlumatların yayılmasını pisləyib, media nümayəndələrini, siyasi və ictimai şəxsləri informasiya yayımında məsuliyyətli davranmağa çağırıb.

Şura, həmçinin ictimaiyyəti belə paylaşımlara tənqidi yanaşmağa, məlumatları etibarlı mənbələrdən yoxlamağa və dezinformasiyanın yayılmasına şərait yaratmamağa dəvət edib.