Dövlət vəzifəsindən gedən məmurlar idman federasiyalarına rəhbərlik etməyə davam edirlər

 Azərbaycanda bəzi yüksək vəzifəli şəxslər dövlət idarəçiliyindəki vəzifələrindən ayrılsalar da, idman federasiyalarının rəhbərliyində qalırlar. Saleh Məmmədov və Zaur Əliyev bu şəxslər sırasındadır.

Bizim.Media-nın məlumatına görə, uzun illər avtomobil yollarının tikintisi və idarə edilməsi sahəsində çalışan Saleh Məmmədov hazırda Azərbaycan Həndbol Federasiyasının prezidentidir.

O, 2015-ci il dekabrın 28-də “Azəryolservis” ASC-nin sədri, 2017-ci il dekabrın 21-də isə Azərbaycan Avtomobil Yolları Dövlət Agentliyinin İdarə Heyətinin sədri təyin edilib.

Məmmədov 2016-cı il dekabrın 1-dən Azərbaycan Həndbol Federasiyasına rəhbərlik edir. Prezident İlham Əliyevin 2026-cı il fevralın 6-da imzaladığı sərəncamla o, Azərbaycan Avtomobil Yolları Dövlət Agentliyinin İdarə Heyətinin sədri vəzifəsindən azad edilib. Həmin gün Vüsal Nəsirli bu vəzifəyə təyin olunub.

Bununla belə, Məmmədov Həndbol Federasiyasının prezidenti vəzifəsində qalır.

Digər nümunə isə Azərbaycan Üzgüçülük Federasiyasının prezidenti Zaur Əliyevdir. O, 2025-ci ildə federasiyanın prezidenti seçilib.

Əliyev 2015-ci ildən İcbari Tibbi Sığorta üzrə Dövlət Agentliyində rəhbər vəzifələrdə çalışıb, sonradan qurumun İdarə Heyətinin sədri olub.

2026-cı ilin martında İcbari Tibbi Sığorta üzrə Dövlət Agentliyinin səlahiyyətləri Əmək və Əhalinin Sosial Müdafiəsi Nazirliyinə həvalə edilib. Aprelin 7-də isə Prezident İlham Əliyevin sərəncamı ilə Zaur Əliyev əmək və əhalinin sosial müdafiəsi nazirinin müavini təyin olunub.

Beləliklə, Əliyev dövlət idarəçiliyindəki vəzifəsini dəyişsə də, Azərbaycan Üzgüçülük Federasiyasının prezidenti kimi fəaliyyətini davam etdirir.