Azay Quliyev Paşinyanın bəyanatlarını etibarsız adlandırıb

Deputat Azay Quliyev Ermənistanın baş naziri Nikol Paşinyanın ölkənin konstitusiyası ilə bağlı referendum və mümkün erkən seçkilər barədə ziddiyyətli açıqlamalar verdiyini deyib və onun bəyanatlarının etibarlılığını şübhə altına alıb. Bu barədə deputat Milli Məclisdə çıxışında bildirilb. 

“Biz Ermənistana inanmalıyıqmı? Yaxud hakimiyyətdə olan Paşinyanın bəyanatları nə qədər etibarlıdır? Mənə elə gəlir ki, o qədər etibarlı deyil”, - Quliyev bildirib.

Deputatın sözlərinə görə, Paşinyan siyasi rəqiblərini referendumla bağlı qərar vermədikləri halda erkən seçki keçirməklə hədələyib. Quliyev deyib ki, Paşinyan bir həftə əvvəl referendum və sənədin imzalanması məsələsinin 2031-ci ilədək həll olunmalı olduğunu söyləyib, son açıqlamasında isə bunun 2027 və ya 2028-ci illərdə həllini nəzərdə tutduqlarını bildirib.

Quliyev Paşinyanın son açıqlamasını Azərbaycan Prezidentinin oktyabrın 15-də Ermənistanla sülhün “kövrək” olduğu barədə fikri ilə əlaqələndirib. “

Mənə görə, dünənki bəyanatın əsas səbəbi məhz bu idi. ‘Kövrəkdir’ sözü bəlkə də Ermənistana bir mesaj, siqnal idi”, - o deyib.

Deputat əlavə edib ki, başqa ölkəyə ərazi iddiasının konstitusiyada əks olunması Ermənistanın daxili işi sayıla bilməz. Onun sözlərinə görə, Ermənistanın konstitusiyası və digər məsələlərdə Türkiyəyə qarşı ərazi iddiaları da normallaşma prosesinə mane olur.

Gülnar Nazimqızı