MKA “Apple” istifadəçilərinə təhlükəsizlik boşluğu ilə bağlı xəbərdarlıq edib

Rəqəmsal İnkişaf və Nəqliyyat Nazirliyi yanında Milli Kibertəhlükəsizlik Agentliyi (MKA) “Apple” məhsullarında aşkarlanan təhlükəsizlik boşluğu ilə bağlı istifadəçilərə xəbərdarlıq edib.

Anews.az Agentliyə istinadən xəbər verir ki, “iOS”, “iPadOS” və “macOS” əməliyyat sistemlərinin bəzi versiyalarında qeydə alınan boşluq kiberdələduzlara cihazları ələ keçirmək imkanı yaradır.

Məlumata görə, hazırda vətəndaşlara xarici nömrələrdən zənglər edilir, “WhatsApp” və “Telegram” hesablarına isə aldadıcı mesajlar vasitəsilə zərərli fayllar göndərilir. Əməliyyat sistemlərinin son versiyalarından istifadə etməyən şəxslərin cihazları həmin fayllar vasitəsilə ələ keçirilə bilər. Bu isə istifadəçi məlumatlarının icazəsiz əldə olunmasına səbəb ola bilər.

MKA istifadəçilərə aşağıdakı təhlükəsizlik tədbirlərini görməyi tövsiyə edir:

“iPhone”, “iPad” və “Mac” cihazlarının əməliyyat sistemlərini ən son versiyaya yeniləmək;

Naməlum və etibarsız mənbələrdən göndərilən faylları açmamaq;

Avtomatik sistem yeniləmələrini aktivləşdirmək.