Siyasi fəal Elçin İbrahimli həbs edildi

Məlumata görə, İbrahimli iyunun 23-də gecə saatlarında polislər tərəfindən evindən aparılıb.

"İyunun 24-də səhər məhkəmə olub. Onu 30 sutka həbs ediblər. Elçin İbrahimli sosial şəbəkələrdə aktiv idi. Onu siyasi və ictimai fəaliyyətinə görə həbs ediblər", - partiya üzvləri deyir.

Bildirilir ki, İbrahimli hazırda rayon polis təcridxanasında yatır və o şəkər xəstəsidir.

Daxili İşlər Nazirliyindən bildirilib ki, fəal İnzibati Xətalar Məcəlləsinin (İXM) 535-ci (polis işçisinin və ya hərbi qulluqçunun qanuni tələbinə qəsdən tabe olmama) maddəsi ilə günahlandırılıb.

"Elçin İbrahimli ilə bağlı polis şöbəsinə vətəndaşların müraciətləri olub. Elçin İbrahimli dəfələrlə polis şöbəsinə dəvət olunsa da, gəlməyib. Polisin tələblərinə tabe olmadığına görə barəsində toplanmış materiallar rayon məhkəməsinə göndərilib", - Nazirlik açıqlamada qeyd edib.

Hələ Əbülfəz Elçibəyin sədrliyi dövründən Azərbaycan Xalq Cəbhəsi Partiyası (AXCP) daxilində "İslahatçılar" ("Yurdçular", "Əli Kərimovçular") və "Klassiklər" ("Mühafizəkarlar", "Elçibəyçilər") adları ilə tanınan iki qanad mövcud idi. "Klassiklər” qanadı 2006-cı ilədək "AXCP” adı ilə fəaliyyət göstərib. Həmin ilin martında "Klassiklər” qanadının bazasında Klassik Xalq Cəbhəsi Partiyası (KXCP) təsis edildi və Mirmahmud Mirəlioğlu KXCP sədri seçildi. KXCP rəsmi dövlət qeydiyyatına 2007-ci ilin yanvarın 31-də alınıb.