SOCAR Türkiyə poliolefin istehsalına investisiyaları artırmağı planlaşdırır
06.01.2025 15:52
SOCAR Türkiyə (STEAS) önümüzdəki on il ərzində Petkim-in mövcud istehsal güclərinə əlavə olaraq bir neçə yeni poliolefin istehsal müəssisəsinin tikintisinə 7 milyard dollar sərmayə yatırmağı planlaşdırır. Bu barədə bazar ertəsi İstanbulda keçirilən mətbuat konfransında SOCAR Türkiyə-nin neft emalı və neft-kimya bölməsinin rəhbəri Kənan Mirzəyev məlumat verib.
"2025-2026-cı illərdə bu yeni istehsal güclərinin yaradılması üçün detallı layihə (FEED) hazırlanacaq və bu mərhələyə təxminən 50 milyon dollar sərmayə yönəldiləcək,” - Mirzəyev bildirib.
Onun sözlərinə görə, STEAS 2008-ci ildən etibarən Petkim-də müxtəlif növ poliolefin və neft-kimya məhsullarının istehsalı üçün təxminən 2 milyard dollar sərmayə qoyub.
Keçən il Petkim-in istehsalı təxminən 2 milyon ton təşkil edib və Türkiyənin poliolefinə olan tələbatının 11-12 faizini təmin edib.
"Türkiyə poliolefin tələbatının 90 faizini idxal edir. Buna görə də, yeni istehsal müəssisələrinin tikintisi ilə bağlı qərarımız Türkiyə üçün sərfəlidir və SOCAR Türkiyə üçün də gəlirli olacaq,” - Mirzəyev əlavə edib.
O həmçinin qeyd edib ki, yekun maliyyə qərarı FEED hazırlandıqdan sonra, böyük ehtimalla 2027-ci ilə qədər verilə bilər.
Petkim Türkiyədə 1965-ci ildən fəaliyyət göstərir.
SOCAR 2008-ci ildə Türkiyə hökumətinin keçirdiyi tenderdə qalib gələrək 2,04 milyard dollara Petkim-in nəzarət paketini əldə edib.
Petkim-in tərkibinə 16 zavod daxildir.
Lada Yevqraşina
www.anews.az
Foto 
Video 
