Tahir Gözəl: "Yeni transferlər "Qarabağ"a fayda verməlidir"

"Baş məşqçi Qurban Qurbanovun bir neçə futbolçu istəyi oldu. O futbolçuların "Qarabağ"a böyük köməyi olacağını düşünürəm".

Qol.Az-ın məlumatına görə, "Qarabağ"ın vitse-prezidenti Tahir Gözəl klubun rəsmi saytına müsahibəsində deyib.

Klub rəsmisi yeni transferlərin komandaya faydalı olacağına inandığını bildirib: "Fikrimcə, gələn futbolçular mütləq "Qarabağ"ın səviyyəsini qaldırmalıdır. Gələn hər bir futbolçu Azərbaycan futboluna, "Qarabağ"a fayda verməlidir. Qurban Qurbanov çox yaxşı futbolçular seçib. Biz də rəhbərlik olaraq hər zamankı kimi baş məşqçimizin arxasındayıq, ona inanırıq".

T.Gözəl bütün Azərbaycanın "Qarabağ"la qürur duyacağını bildirib: "Məqsədimiz 1-2 transferlə digər klublara çox çətin rəqib olmaqdır. "Monako"nun rəsmisi də bunu vurğulayıb ki, "Qarabağ" zəif rəqib deyil. Onlara qarşı çətin olacaq. Bir daha onu demək istəyirəm ki, rəhbərlik olaraq klubumuzun, Qurban Qurbanovun arxasında möhkəm dayanmışıq. Biz əlimizdən gələn dəstəyi verməyə çalışırıq. Hesab edirəm ki, Azərbaycan güclü, imanlı və inamlı komanda görəcək. Nəticədən asılı olmayaraq bütün ölkə "Qarabağ"la qürur duyacaq".


www.ann.az