Ermənilər tərəfindən öldürülmüş azərbaycanlının həkimi danışdı

Sport7.az onunla "Abşeron" klubunda bir yerdə işləmiş həkim-fizioterapevt Rahim Məhərrəmovu bu məsələ ilə bağlı danışdırıb.

Hazırda "Qəbələ" klubunda çalışan Məhərrəmov mərhumla bağlı xatirələrini danışarkən onun gülərüz uşaq olduğunu bildirib: "Onun da bəxti bura kimi imiş. Emillə mən "Abşeron"da bir yerdə olmuşuq. Gülərüz, deyib-gülən uşaq idi. Futbolçu kimi karyerası alınmasa da, heç kimin xətrinə dəyməyən bir insan idi. Hamı ilə zarafatlaşırdı, deyib gülürdü. Bizimlə də münasibəti yaxşı idi. Kiçik qardaş kimi onun xətrini çox istəyirdik. Allah rəhmət etsin"

Rahim bəy əvvəlcə onun ölüm xəbərinə inanmadığını söyləyib: "Abşeron" klubu dağıldıqdan sonra onunla elə bir əlaqəm olmayıb. 1-2 dəfə sosial şəbəkə vasitəsilə bayramımı təbrik edib. Sonuncu dəfə məni Novruz Bayramında təbrik etmişdi. Sağolsun, unutmurdu, məni yada salırdı. Mənə onun şəklini və ölüm xəbərini yolladılar. Açığı, əvvəlcə buna inanmadım. Elə bildim ki, kimsə zarafatlaşır. Sonra gördüm ki, yox xəbər düz imiş... Uşaqlarla bayaq onu danışırdıq ki, vaxt edib Gəncəyə onun heç olmasa "3" mərasiminə gedək".