Beş icra hakimiyyəti İT sistemlərini "Hökumət buludu"na köçürüb

Sumqayıt Şəhər İcra Hakimiyyəti, həmçinin Salyan, Şəmkir, Ağsu və Hacıqabul rayon icra hakimiyyətləri informasiya sistemləri və İT resurslarını dövlətin "Hökumət buludu" (G-cloud) platformasına köçürüblər. Bu barədə layihənin icraçısı olan "AzInTelecom" MMC məlumat yayıb.

Məlumata görə, adıçəkilən qurumların İT resursları "AzInTelecom"a məxsus Bakı Əsas Data Mərkəzində yerləşdirilib və onlara Virtual Server (Infrastructure-as-a-Service – IaaS) xidməti təqdim olunub. Şirkət bunun nəticəsində kritik informasiya sistemlərinin yüksək əlçatanlığının təmin edildiyini bildirib.

Layihə çərçivəsində dövlət qurumlarının informasiya sistemləri tam və ya qismən "AzInTelecom"un data mərkəzlərinə miqrasiya edilir. Şirkətin məlumatına görə, bu, İT xərclərinin azaldılmasına, sistemlərin məhsuldarlığının artırılmasına, daha təhlükəsiz və dayanıqlı infrastrukturun formalaşdırılmasına, həmçinin 24 saat fasiləsiz monitorinq xidmətinin təmin edilməsinə imkan yaradır.

"Hökumət buludu" layihəsi Azərbaycan Prezidenti İlham Əliyevin 3 iyun 2019-cu il tarixli fərmanına əsasən həyata keçirilir. Layihənin məqsədi dövlət qurumlarının informasiya sistemlərini vahid bulud infrastrukturunda cəmləşdirərək dövlət informasiya resurslarının idarə edilməsinin səmərəliliyini və kibertəhlükəsizliyini artırmaqdır. AZCON Holding-in tərkibinə daxil olan "AzInTelecom" bulud xidmətlərini TIER III beynəlxalq standartlarına uyğun data mərkəzləri vasitəsilə təqdim edir.

Gülnar Nazimqızı