Türkiyə parlamenti yeni universitet layihəsini təsdiqlədi - RƏSMİ

Türkiyə Böyük Millət Məclisi (TBMM) Fənərbağça Universitetinin yaradılmasını təsdiq edib.

Bu barədə Fənərbağça Futbol Klubunun rəsmi internet saytında məlumat dərc olunub.

ANN.Az xəbər verir ki, TBMM-nin qəbul etdiyi təsdiqnaməyə əsasən, universitetin təsis edilməsi Fənərbağça Təhsil, Mədəniyyət və Sağlamlıq Təşkilatı tərəfindən həyata keçirilir.

Universitetdə İdman elmləri, Sağlamlıq elmləri, Mühəndislik və Memarlıq, İqtisadiyyat və İdarəetmə, İctimaiyyətlə əlaqələr fakültələri də fəaliyyət göstərəcək. Eyni zamanda, magistratura mərhələsi üçün Sosial elmlər, Sağlamlıq elmləri fakültələri də daxil olmaqla, ümumilikdə, 5 fakültə və 20 akademik bölmə üzrə tədris aparılacaq.

Fənərbağça klubunun Təhsil, Mədəniyyət və Sağlamlıq Təşkilatının sədri, professor Əli Rza Böyükuslu ANN.Az-a açıqlamasında bildirmişdi ki, layihə qısa zaman ərzində TBMM tərəfindən təsdiq ediləcək və bu barədə "Rəsmi qəzet"də məqalə dərc olunacaq: "Yalnız bundan sonra lazımi işlərə başlanacaq".

Qeyd edək ki, Təşkilat universitetin yaradılması üçün 2016-cı ilin mart ayında müraciət edib. 17 mart 2016-cı il tarixdə isə Türkiyə Yüksək Tədris Qurumu (YÖK) tərəfindən qəbul edilib.