Moskvada ABŞ səfirliyinin qarşısında viza almaq istəyənlərin uzun növbəsi yaranıb

anews.az-ın məlumatına əsasən, bu barədə Report RİA "Novosti”yə istinadən xəbər verir.

Xatırladaq ki, avqustun 22-i diplomatik nümayəndəliyin Rusiya vətəndaşlarına viza verməsi ilə bağlı sonuncu gündür.

Sentyabrın 1-də isə vizaların verilməsində fasilə olacaq. Bu səbəbdən də səfirliyin binası qarşısında uzun növbə yaranıb. Həmin insanların arasında viza almaq üçün müsahibəyə, yaxud hazır vizanı almaq üçün gələnlər də var. Sənədlər və ziyarətçilər yoxlanıldıqdan sonra onları səfirliyin binasına buraxırlar.

Məlumata görə, növbədə dayananlar viza alacaqlarına ümid edirlər.

Dünyanın bütün ölkələrində ABŞ səfirliyinə viza almaq üçün müraciət edənlərə vaxt təyin olunur. Bu baxımdan, növbədə dayananların hamısına viza veriləcəyi ehtimal edilir.

Qeyd edək ki, ABŞ səfirliyi Rusiyada qeyri-immiqrasiya vizalarının verilməsini dayandırır.

Bu il sentyabrın 1-dən etibarən turist, iş vizalarının verilməsi yalnız Moskvada həyata keçiriləcək. 

Xatırladaq ki, iyulun 30-da Rusiya prezidenti Vladimir Putin ABŞ-ın Rusiyadakı diplomatlarının sayının 755 nəfər azalacağını və Rusiyanın ABŞ-dakı diplomatlarının sayı qədər - 455 nəfər saxlanılacağını bildirib. Bu tədbirlər ABŞ-ın Rusiya əleyhinə sanksiyalar qəbul etməsi və 2017-ci ilin əvvəlində rusiyalı diplomatların ölkədən çıxarılmasına cavab olub.