Dənizin dibində yeni "Atlantida" aşkarlandı - Arxeoloji tapıntı

İsveç alimləri Baltik dənizinin dibindən 11 min il əvvələ məxsus unikal artefaktlar tapıblar. 

ANN.Az-ın "Utro.ru"ya istinadən verdiyi xəbərə görə, arxeoloqlar daş dövrünə aid artefaktların 11 min il əvvəl yaşamış köçəri insanlara məxsus olduğunu güman edirlər. Jurnalistlərin "İsveç atlantidası" adlandırdıqları tapıntı burada ən qədim skandinav tayfalarından birinin yaşadığını deməyə əsas verə bilər. 

İsveç alimləri arxeoloji tapıntıları Baltik dənizinin Skonedəki sahillərində 16 metr dərinlikdə aşkar ediblər. Bəzi predmetlər o qədər yaxşı qalıb ki, alimlər əhalinin təbii kataklizmlər nəticəsində suyun altında qaldığı nəzəriyyəsini irəli sürüblər. Arxeoloqlar taxta fraqmentlər, çaxmaqdaşı , heyvan buynuzları və kəndirlər aşkar ediblər. Daha vacib tapıntılar isə heyvan sümüyündən hazırlanmış oyma qarpun və nəsli kəsilmiş heyvan növü olan turların qalıqlarıdır. Onların sonuncu nümayəndələrinin nəsli Polşada 1627-ci ildə kəsilib. 

"11 min il əvvəl burada tikililər olub. Əgər tapıntılar quru yerdə tapılsaydı, biz daşdan hazırlanmış əşyalar da tapardıq, onların heç biri orqanik olmayacaqdı", Arxeoloji ekspedisiyanın rəhbəri Baron Linson mətbuata açıqlamasında deyib. O həmçinin bildirib ki, burada heç vaxt daimi yaşayış olmayıb, köçərilər buradan müvəqqəti yaşayış yeri kimi istifadə ediblər. 

ANN.Az