Səudiyyə diplomatı tekila içib yapon qadına təcavüz edib

Hadisənin 2024-cü ilin iyul ayında baş verdiyi bildirilir. İstintaq məlumatlarına görə, Səudiyyə Ərəbistanı səfirliyinin attaşesi spirtli içki təsiri altında Tokionun mərkəzində tanımadığı bir qadınla söhbət edib, daha sonra isə ona qarşı nalayiq hərəkətlər etməyə başlayıb. Yerli sakin polis çağırıb.

Diplomat spirtli içki testindən keçməkdən imtina edib, lakin "tekila içdiyini" etiraf edib. O, polis əməkdaşları ilə birlikdə bölməyə getməyə razılaşıb, lakin orada özünü diplomatik işçi kimi təqdim edərək bölmədən ayrılıb.

Daha sonra Yaponiya polisi iki dəfə həmin şəxsi danışıq üçün çağırsa da, hər iki müraciətə məhəl qoyulmayıb. Qeyd olunur ki, yaxın zamanda polis işi prokurorluğa təqdim etmək niyyətindədir. Qəzetin məlumatına görə, diplomat artıq Yaponiyanı tərk edib və Səudiyyə Ərəbistanına qayıdıb.