Putinin köməkçisi Ukrayna nümayəndə heyətinə şərt qoyub

Rusiya nümayəndə heyəti bu gün İstanbulda keçiriləcək danışıqlarda Ukrayna tərəfini yerli vaxtla saat 10:00-dan gözləyəcək. Bu barədə Rusiya nümayəndə heyətinin rəhbəri, prezidentin köməkçisi Vladimir Medinski TASS-a bildirib.

“Səhər saat 10-dan etibarən Ukrayna tərəfini görüşə gözləyəcəyik. Biz danışıqlara tam hazırıq”, — o bildirib.

Medinski qeyd edib ki, Rusiya nümayəndə heyəti Ukrayna ilə birbaşa ikitərəfli danışıqlar üçün əvvəlcədən heç bir şərt irəli sürmədən İstanbula gəlib. Bundan əvvəl, cümə axşamı Rusiya tərəfi Türkiyənin xarici işlər naziri ilə görüş keçirib və Medinski bu görüşü “səmərəli” adlandırıb.

ABŞ dövlət katibi Marko Rubio Rusiya və Ukrayna arasında keçiriləcək danışıqlarda şəxsən iştirak etməyəcəyini bildirib.

Onun sözlərinə görə, Vaşinqtonu bu danışıqlarda daha aşağı səviyyəli rəsmilər təmsil edəcək. Rubio əlavə edib ki, danışıqlar zalında Türkiyə rəsmilərinin də iştirak edəcəyinə ümid edir.

“Bura gəlməyimizin səbəbi ruslarla ukraynalılar arasında birbaşa toqquşma riskinin olduğuna dair məlumat almağımızdır”, —  Rubio CNN-ə bildirib.

O əlavə edib ki, cümə günü Ukraynanın xarici işlər naziri və nümayəndə heyəti ilə görüşəcək. Bundan sonra ABŞ nümayəndə heyətinin bir üzvü danışıqlarda iştirak edəcək.

RIA Novosti agentliyi Türkiyə Xarici İşlər Nazirliyinə istinadla xəbər verir ki, mayın 16-da İstanbulda Rusiya–Ukrayna–Türkiyə və ABŞ–Ukrayna–Türkiyə formatlarında üçtərəfli görüşlər keçiriləcək.

Rusiya ilə Ukrayna arasında danışıqlar əvvəlcə mayın 15-nə təyin olunub.  lakin cümə axşamı axşam saatlarında onların cümə gününə keçirildiyi bildirilib.

Rusiya nümayəndə heyəti İstanbulda cümə axşamı səhər saatlarında olub və heyətə prezidentin köməkçisi Vladimir Medinski rəhbərlik edir.

N.Təbrizli