İran rəsmiləri ABŞ-ın nüvə obyektlərinə zərbələrini gözləniləndən zəif adlandırıb

The Washington Post qəzetinin ABŞ kəşfiyyat mənbələrinə istinadən yazdığına görə, İran rəsmiləri son ABŞ zərbələrinin ölkənin nüvə infrastrukturuna gözlənildiyindən daha az ziyan vurduğunu bildiriblər.

Məlumata görə, telefon danışıqları zamanı iranlı rəsmilər prezident Donald Trampın əmri ilə həyata keçirilmiş hücumların niyə bu qədər məhdud effektlə nəticələndiyini müzakirə ediblər.

Ağ Evin mətbuat katibi Karolayn Livitt bu məlumatı “kontekstdən çıxarılmış sızma” adlandırıb.

“Adsız İran rəsmilərinin dağıntıların altındakı vəziyyəti bildiyini düşünmək absurddur. Onların nüvə proqramı məhv edilib,” –  o qeyd edib.

CNN-in daha əvvəl yaydığı məlumata əsasən, ABŞ kəşfiyyatının ilkin qiymətləndirməsi zərbələrin İranın əsas nüvə komponentlərini məhv etmədiyini, yalnız nüvə bombası hazırlığını bir neçə ay ləngitdiyini göstərib.

Pentaqon bu nəticələrin “aşağı etimadla” verildiyini bildirib.

25 iyunda Tramp və müdafiə naziri Pit Hegseth bəyan ediblər ki, Fordo, Natanz və İsfahan obyektləri “praktiki olaraq xəritədən silinib”.

N.Təbrizli