İzmir hava limanı meşə yanğınlarına görə müvəqqəti bağlanıb

Türkiyənin qərbində yerləşən İzmirdə Adnan Menderes Beynəlxalq Hava Limanı əyalətdə davam edən meşə yanğınları səbəbindən uçuşları müvəqqəti dayandırıb. Bu barədə Milliyet qəzeti məlumat yayıb.

Yanğın ocaqları Gaziemir bölgəsinə yaxın yerləşir.

Güclü tüstü və yanğınsöndürmə təyyarələrinin fəaliyyəti səbəbindən bir sıra reyslər ləğv edilib və ya digər şəhərlərə yönləndirilib.

Uçuşların yanğınlar nəzarətə götürüldükdən sonra bərpa olunacağı gözlənilir.

İzmir valisi Süleyman Elban bildirib ki, 1 000-dən çox yanğınsöndürən və onlarca texnika alovla mübarizə aparır. Küləyin sürəti 117 km/saata çatdığı üçün yüngül hava texnikası fəaliyyət göstərə bilmir, yalnız ağır təyyarələr işləyir.

Səfərihisar rayonunda beş yaşayış məntəqəsi təxliyə olunub.

Kənd Təsərrüfatı və Meşə Təsərrüfatı naziri İbrahim Yumaklı son iki gündə Türkiyədə 150 meşə yanğınının qeydə alındığını, onların əksəriyyətinin qərb və şimal-qərb bölgələrində baş verdiyini deyib.

N.Təbrizli