Putin Telegram və WhatsApp-a məhdudiyyətlər qoyub

Rusiya prezidenti Vladimir Putin hökumətə “düşmən xarici ölkələrdə” hazırlanmış proqram təminatlarına, o cümlədən Telegram və WhatsApp kimi messencerlərə məhdudiyyətlər tətbiq olunması ilə bağlı təkliflər hazırlamağı tapşırıb.

Kremlin saytında dərc olunan sənədə əsasən, baş nazir Mixail Mişustin 1 sentyabra qədər hesabat təqdim etməlidir.

Bu təşəbbüs Rusiya istehsalı olan və dövlət rəqəmsal platformaları ilə inteqrasiya olunacaq MAX messencerinin yaradılmasını nəzərdə tutan yeni qanunun qəbulundan sonra irəli sürülüb.

“İnternetin Müdafiəsi Cəmiyyəti”nin rəhbəri Mixail Klimaryev xəbərdarlıq edib ki, MAX platforması vətəndaşlara nəzarət vasitəsinə çevrilə bilər, çünki onun məxfilik siyasəti məlumatların dövlət orqanlarına ötürülməsinə imkan verir.

Bu arada, Dövlət Dumasında Telegram və WhatsApp-a qarşı daha sərt tədbirlərin mümkünlüyü müzakirə olunur. “Na Svyazi” layihəsi Rusiyada bu platformalara girişin məhdudlaşdırılması üzrə testlərin keçirildiyini bildirib.

N.Təbrizli