Atlantada oktyabrın 30-31-də G20 ölkələrinin XİN başçılarının görüşü keçiriləcək

ABŞ-nin dövlət katibi Marko Rubio oktyabrın 30-31-də Corciya ştatının Atlanta şəhərində G20 ölkələrinin xarici işlər nazirlərinin görüşünü keçirəcək.Bu barədə ABŞ Dövlət Departamenti məlumat yayıb.

Departamentdən bildirilib ki, Prezident Donald Trampın rəhbərliyi altında ABŞ G20-ni iqtisadi artımın təşviqinə, iqtisadi təhlükəsizliyin gücləndirilməsinə və Amerika xalqının maraqlarına uyğun nəticələrin əldə olunmasına yönəltməyi hədəfləyir.

Məlumata görə, Rubio ümumi iqtisadi və təhlükəsizlik problemlərinin həlli istiqamətində praktiki əməkdaşlığı inkişaf etdirmək məqsədilə G20 ölkələrinin xarici işlər nazirlərini bir araya gətirəcək.

Görüşdə dünya iqtisadiyyatına təsir edən geosiyasi böhranlar, o cümlədən gəmiçilik azadlığına, enerji və ərzaq təhlükəsizliyinə, eləcə də qlobal tədarük zəncirlərinə təhdidlər müzakirə olunacaq.

Dövlət Departamentindən qeyd edilib ki, qlobal təhlükəsizlik və iqtisadi rifah bir-biri ilə sıx bağlıdır. Qarşıdakı müzakirələr Donald Trampın sədrliyi ilə keçiriləcək G20 liderlərinin sammitinə hazırlığın və daha geniş iqtisadi gündəliyin nəzərdən keçirilməsinin bir hissəsi olacaq.