İrlandiyada təhdid məktubu göndərənlər Avropanı yeni hücumlarla hədələyiblər

İrlandiyanın bir neçə media qurumunun əməkdaşlarının təxliyəsinə və bir sıra sərnişin təyyarələrinin təcili eniş etməsinə səbəb olan təhdid məktubunun müəllifləri Avropada yeni hücumlar barədə xəbərdarlıq ediblər.

Bu barədə "Financial Times" xəbər verir.

Qəzet media qurumlarına göndərilmiş elektron məktubun məzmunu ilə tanış olub.

Məktubda bildirilir ki, bu həftə baş verən hadisələr yaxın gələcəkdə Avropanı gözləyənlərin yalnız kiçik bir hissəsidir.

Müəlliflər sərnişin təyyarələrinə, kruiz laynerlərinə, metro stansiyalarına və qatarlara hücum edəcəkləri ilə hədələyiblər.

Daha əvvəl İrlandiyanın RTE telekanalı daxil olan təhdidlər səbəbindən noyabrın 6-da əməkdaşlarını təxliyə etməyə və yayımı müvəqqəti dayandırmağa məcbur qaldığını açıqlayıb.

Telekanalın məlumatına görə, elektron məktubun mövzu hissəsində böyük hərflərlə “Qərbə mesaj” ifadəsi yazılıb.