Belə ki, bəzi qüvvələr hakimiyyət nümayəndəsinə silah qaldıran, eləcə də digər bir şəxsi yaralayaraq ağır cinayət törədən şəxsi qəhrəmana çevirərək onu cəmiyyətimizdə "örnək” etmək niyyətindədilər. Eyni zamanda cinayət törədən şəxsi qəhrəmana çevirməklə ölkədə asayişi pozmağa, radikal addımlar atmağa, itaətsizliyə təhrik edən, sövq edən insanlara da rast gəldik.
Belə çağırışlar edən şəxslər məsuliyyətə cəlb ediləcəkmi? Onları hüquqi məsuliyyət gözləyirmi? Hüquq mühafizə orqanları həmin şəxslərlə bağlı ölçü götürəcəkmi?
Bununla bağlı Bizimyol.info-un suallarını cavablandıran Azərbaycan Respublikası Milli Məclisinin vəkili, hüquqşünas Çingiz Qənizadə həmin şəxslərin hüquq mühafizə orqanları tərəfindən aşkarlanaraq məsuliyyətə cəlb ediləcəyini və bu cür çağırışların hüquqi məsuliyyət törətdiyini bildirib:
"Yunis Səfərov Azərbaycan hakimiyyət nümayəndəsinə qarşı silah işlədərək sui-qəsd törədib. Hesab edirəm ki, bu əməl ciddi pislənməlidir. Əgər bu cinayət əməlininin digər iştirakçıları da varsa onlar da araşdırılaraq məsuliyyətə cəlb edilməlidir. Mən ümid edirəm ki, Azərbaycan Respublikası Prokurorluğu bu cinayəti obyektiv araşdıraraq cinayət iştirakçısı olan hər kəsin qanun qarşısında cavab verməsini təmin edəcəkdir.
Azərbaycan bu gün Yaxın Şərqdə ən stabil ölkələrdən biridir. Hətta bu gün Avropa ölkələrində də bəzən terror, silahlı basqın hadisələrinə rast gəlirik amma Azərbaycan regionun ən sabit ölkələrindəndir. Mən arzu edirəm ki, bu sabitliyi Tanrı Azərbaycan xalqına çox görməsin. Bütün bunların fonunda isə təəssüf hissi ilə qeyd etmək istərdim ki, siyasi sabitliyi pozmaq istəyən insanlar da var. Onlar müəyyən çağırışlar edirlər, itaətsizlik edirlər, itaətsizliyə çağırış edirlər ki, bu da birmənalı olaraq yolverilməzdir.
Qanunla da ölkədə ictimai-siyasi sabitliyi pozmağa edilən hərhansısa çağırış qanunla qadağandır və bu hüquqi məsuliyyət yaradan haldır. Belə bir çağırış edən hər bir kəs, hər bir KİV, hər bir təşkilat birbaşa məsuliyyət daşıyırlar. Şübhəsiz ki, hüquq mühafizə orqanları həmin çağırışlar edən şəxsləri, itaətsizliyə səsləyən, radikal addımlar atmağa səsləyən insanları aşkarlayacaq və onları məsuliyyətə cəlb edəcəklər. Bu inzibati məsuliyyət də ola bilər, cinayət məsuliyyəti də ola bilər. Bunlar isə çağırışların mahiyyətindən asılı olaraq dəyişir
Azərbaycanın hüquq mühafizə orqanları kifayət qədər peşəkardılar və ən son texniki avadanlıqlarla təchiz ediliblər. Hesab edirəm ki, onlar həmin çağırışda bulunan insanları aşkarlayacaq və onları da məsuliyyətə cəlb edəcəklər. Eyni zamanda bir gün öncə Ələkrəm Hümmətov da xaricdə Yunis Səfərovu el qəhrəmanı elan edərək, onun hüquqlarının müdafiəsi komitəsi yaradıb. Qeyd edim ki, Yunis Səfərovun prosessual hüquqları onun vəkili tərəfindən və dövlətimiz tərəfindən qorunur, burada onun pozulan heç bir hüquqlarından söhbət belə gedə bilməz. Ələkrəm Hümmətovun isə ümumiyyətlə Azərbaycana heç bir aidiyyəti yoxdur. Cinayət hadisəsi törətmiş bir insandan qəhrəman düzəltmək, bundan istifadə edərək hərhansısa bir çağırışlar etmək yolverilməzdir və ölkəmizdəki stabilliyi heç kim, heç bir halda poza bilməyəcək”.
www.anews.az
Bizi sosial şəbəkələrdə izləyin !
