Akvakultura avadanlıqlarına 2027-ci ildən dövlət güzəşti tətbiq ediləcək

Balıqçılıq və akvakultura təsərrüfatlarında istifadə olunan bir sıra avadanlıqlara 2027-ci ilin yanvarından dövlət güzəştlərinin tətbiqi nəzərdə tutulur. Bunu Kənd Təsərrüfatı Nazirliyi yanında Aqrar Kredit və İnkişaf Agentliyinin sədr müavini Elnur Musayev bildirib.

Onun sözlərinə görə, güzəşt siyahısına qapalı su dövriyyəsi sistemləri (RAS), aeratorlar, oksigen generatorları, filtrasiya və dezinfeksiya avadanlıqları, su nasosları, isitmə-soyutma qurğuları, qəfəs sistemləri, yemləmə avadanlıqları, kürü inkubatorları və digər texnologiyalar daxildir.

Mövcud mexanizmə əsasən, texnikanın gömrük bəyannaməsi dəyərinin 40 faizi dövlət tərəfindən əvəzsiz qarşılanır, qalan hissə üzrə faizsiz kredit verilir. Kredit faizlərini dövlət ödəyir, fermer isə ən azı 20 faiz ilkin ödəniş edir.

Musayev qeyd edib ki, güzəştlər intensiv və suya qənaət edən texnologiyalara keçidi, yerli balıq körpəsi istehsalını və idxaldan asılılığın azaldılmasını təşviq edəcək.

Agentliyin sədr müavini məhsul subsidiyalarına da toxunaraq bildirib ki, yerli qızılbalıqkimilər və nərəkimilərin hər tonuna 2 000 manat, çəkikimilər və naxakimilərin hər tonuna isə 600 manat subsidiya veriləcək.

Subsidiyadan yararlanmaq üçün təsərrüfatlar Elektron Kənd Təsərrüfatı İnformasiya Sistemində qeydiyyatdan keçərək müraciət etməlidirlər. Ödənişlər yoxlamalardan sonra həyata keçiriləcək.