Banklar xarici valyutanın alqı-satqısı üzrə əməliyyatları artırıb

17:59 | 28.11.2022
Azərbaycanda banklar 2022-ci ilin 9 ayında  nağd xarici valyutanın alqı-satqısı üzrə əməliyyatları təxminən 1,5 dəfə artırıb. Bu barədə Mərkəzi Bank məlumat verib. 

2022-ci ilin yanvar-sentyabrında Azərbaycanda banklar ümumilikdə 3,9 milyard ABŞ dolları məbləğində nağd xarici valyutanın alqı-satqısı üzrə əməliyyatlar həyata keçirib ki, bu da 2021-ci ilin eyni dövrü ilə müqayisədə 46,9% çoxdur.

"Hesabat dövründə bankların nağd xarici valyutanın alqı-satqısı üzrə əməliyyatlarının həcmi 3,9 milyard dollar təşkil edib ki, bunun da 87,2 faizi ABŞ dollarının payına düşüb”, - deyə Mərkəzi Bank bildirib. .

Eyni zamanda, 2022-ci ilin birinci rübündə belə əməliyyatların həcmi 1,2 milyard dollar, ikinci rübdə 1,4 milyard dollar, üçüncü rübdə  isə 1,3 milyard dollar təşkil edib.

Mərkəzi Bank qeyd edib ki, bu ilin birinci rübündə nağd xarici valyuta satışının yüksək olması səbəbindən nağd xarici valyutanın xalis satışı 9 ayda 48,1% artıb. Eyni zamanda aprel-sentyabrda vəziyyət dəyişib və banklar tərəfindən valyuta alışı satışı üstələyib.

Mərkəzi Bank vurğulayıb ki, 2022-ci ilin 9 ayı ərzində Azərbaycanda nağdsız valyuta bazarının həcmi 22,3 milyard ABŞ dolları təşkil edib (2021-ci ilin yanvar-sentyabrı ilə müqayisədə 16,3% artıb).
 
"Valyuta bazarında aparılan əməliyyatların 84,5%-i dolların, 15,5%-i isə digər valyutaların payına düşüb", - Mərkəzi Bankdan bildirilib.

Mərkəzi Bankdan verilən məlumata görə, nağdsız valyuta əməliyyatlarının 29,6 faizi banklararası valyuta bazarında, 70,4 faizi isə bankdaxili valyuta bazarında aparılıb.

9 ayda banklararası valyuta bazarında əməliyyatların 99,1%-i ABŞ dolları ilə aparılıb. "Hesabat dövründə əməliyyatların həcmi keçən ilin eyni dövrü ilə müqayisədə 19,9% artaraq 6,6 milyard dollar ekvivalentində olub. Banklararası valyuta bazarında valyuta əməliyyatlarının dövriyyəsi əsasən Bloomberg platformasında aparılan əməliyyatlar hesabına formalaşıb.

Bankdaxili valyuta bazarında aparılan valyuta əməliyyatlarının həcmi 15,7 milyard dollar (artım 14,8%) ekvivalentində olub ki, bunun da 78,3%-i ABŞ dolları ilə aparılıb. Bankdaxili valyuta bazarında aparılan valyuta əməliyyatlarının 93 faizi hüquqi şəxslərlə aparılan əməliyyatların payına düşüb.
 
N.Təbrizli

www.anews.az
0
Bizi sosial şəbəkələrdə izləyin !

REKLAM

Xəbər lenti

“Bir Pəncərə İxraca Dəstək Mərkəzi” xətti ilə ixrac azalıb