Əliyev Xankəndi Dəmir Yolu və Avtovağzal Kompleksinin təməlini qoyub

Azərbaycan Prezidenti İlham Əliyev iyulun 3-də Xankəndi şəhərində Dəmir Yolu və Avtovağzal Kompleksinin təməlini qoyub.

Rəqəmsal inkişaf və nəqliyyat naziri Rəşad Nəbiyev və “Azərbaycan Dəmir Yolları” QSC-nin sədri Rövşən Rüstəmov dövlət başçısına layihə barədə məlumat veriblər.

Ağdam–Xankəndi dəmir yolu xəttinin uzunluğu 28 km, yan yollarla birlikdə isə 34,7 km olacaq. Layihə çərçivəsində 4 körpü, 5 yolötürücü, 3 piyada keçidi və digər infrastrukturun inşası nəzərdə tutulur. Dəmir yolu boyunca Əsgəran, Xocalı və Xankəndidə stansiyaların tikilməsi planlaşdırılır.

Tikintisi 2025–2026-cı illəri əhatə edəcək kompleksin ümumi sahəsi 6,4 hektar olacaq. Beşmərtəbəli bina dəmir yolu və avtovağzal hissələrindən ibarət olacaq. Gündəlik 800-1000 sərnişin dəmir yolu, 1000-1200 sərnişin isə avtovağzal vasitəsilə daşınacaq.

Ağdam–Xankəndi dəmir yolu ilk dəfə 1979-cu ildə Ümummilli Lider Heydər Əliyevin təşəbbüsü ilə inşa edilib.