Avstriyanın nümayəndə heyəti ADU-da oldu

Qonaqları salamlayan professor Dünyamin Yunusov onları ADU-da görməkdən şad olduğunu dilə gətirdi. O, ali təhsil müəssisəsinin yaranma tarixi, beynəlxalq əlaqələri, tədris prosesi haqqında qonaqlara məlumat verdi. Dillər Universitetində 22 dilin tədris edilməsi ilə yanaşı burada 17 dil və mədəniyyət mərkəzinin mövcud olduğunu söyləyən professor, ali təhsil ocağında, həmçinin Avstriya Kitabxanası və Avstriya Akademik Mübadilə Xidmətinin (OeAD) də fəaliyyət göstərdiyini sözlərinə əlavə etdi. ADU-da Avstriya kitabxanası açıldığı ildən başlayaraq Azərbaycanda fəaliyyət göstərən Avstriya Səfirliyi tərəfindən böyük dəstək aldığını deyən professor D.Yunusov hər il kitabxana fondunun Avstriya Xarici İşlər Nazirliyi tərəfindən yeni kitablarla genişləndiyini vurğuladı. Professor Dünyamin Yunusov universitetin Avstriyanın səfirliyi ilə sıx əməkdaşlıq etdiyini dedi və bu əlaqələrin davam edəcəyinə ümidvar olduğunu söylədi. 

Səmimi qəbula görə təşəkkür edən Avstriya Respublikasının Federal Avropa, İnteqrasiya və Xarici işlər nazirinin müavini Mixael Linhart ADU-da olmaqdan məmnunluğunu dilə gətirdi. O, bu görüşün ikitərəfli əlaqələrin inkişafına böyük töhfə verəcəyinə əminliyini ifadə etdi və təhsil sahəsində olan əməkdaşlığın önəmli faktor olduğunu vurğuladı. M.Linhart universitetdə Avstriya kitabxanasının fəaliyyətini yüksək qiymətləndirdi. O, Avstriya kitabxanasının və Avstriya Akademik Mübadilə Xidmətinin (OeAD) Bakıdakı İnformasiya Mərkəzinin  ADU-da fəaliyyət göstərməsinin əlaqələrin genişlənməsi üçün bir təkan olduğunu bildirdi. Avstriya kitabxanasının Avstriyanı Azərbaycanda təmsil etməklə yanaşı, alman dilini də təbliğ etdiyini deyən M.Linhart Avstriyaya təhsil almağa gedən azərbaycanlı tələbələrin sayının artdığını da sözlərinə əlavə etdi. 

Görüşdə gələcək əməkdaşlıq perspektivləri, qarşılıqlı əlaqələrin inkişafı, birgə layihələrin həyata keçirilməsi haqqında fikir mübadiləsi aparıldı.

Görüşdən sonra qonaqlar Avstriya Kitabxanası və Avstriya Akademik Mübadilə Xidmətinin (OeAD) Bakıdakı İnformasiya Mərkəzi ilə tanış oldular.

Daha sonra tələbələrlə görüşən Avstriya Respublikasının Federal Avropa, İnteqrasiya və Xarici işlər nazirinin müavini Mixael Linhart onları maraqlandıran sualları cavablandırdı.

Qeyd edək ki, görüşdə Avstriya Respublikasının Azərbaycandakı Fövqəladə və Səlahiyyətli səfiri cənab Aksel Vex də iştirak edirdi.