Reket baş redaktor məhkəmə qarşısında

Anews.az-ın məlumatına görə, ötən il iyulun 14-də DİN Baş Mütəşəkkil Cinayətkarlığa Qarşı Mübarizə İdarəsinin (BMCQMİ) əməkdaşları Binəqədi rayonunda, "Qədim Qəbələ” restoranında vətəndaş Şirin Abdullayevdən, barəsində rüsvayedici məlumatlar yaymamaq məqsədilə 3000 manat pul alan zaman Millitv.az saytının baş redaktoru Rövşən Qasımov, saytın əməkdaşları Elmira Məmmədova, Natəvan Mehdiyeva və Yeganə Əhmədova saxlanılıblar. 

Fakta görə cinayət işi başlanılıb.

Məhkəmə prosesində dövlət ittihamçısı ittiham aktını elan edib. Daha sonra təqsirləndirilən Rövşən Qasımov ifadə verərək bildirib ki, sözügedən saytı 2016-cı ildə təsis edib. Onun sözlərinə görə, Yeganə Əhmədova  deyib ki, qadınları cinsi istismara məruz qoyan əxlaqsızlıq yuvası var, həmin yerin də rəhbəri Şirin Abdullayevdir:

"Həmin yerdə çəkiliş apardıq. Mən müştəri kimi yaxınlaşdım, 30 manat müqabilində mənə intim münasibət təklif etdilər. Biz bu sübutları polisə təqdim etdik. Bir neçə gündən sonra Abdullayev görüşüb, söhbət etməyi təklif etdi. Binəqədi rayonunda restoranda görüşdük, orada bizə mülki geyimli şəxslər yaxınlaşdılar”.

Növbəti proses mayın 30-a təyin edilib.