“Magistr oğlanların sayı 74 faiz artıb” - Təhsil naziri

AzVision.az xəbər verir ki, bunu Azərbaycan Milli Elmlər Akademiyasının illik ümumi yığıncağında çıxış edən təhsil naziri Ceyhun Bayramov deyib.

Onun sözlərinə görə, son 4 ildə Təhsil Nazirliyi sisteminə daxil olan ali məktəblərin alimlərinin impakt faktorlu jurnallarda çap olunan məqalələrinin sayı 68 faiz artıb. 

"2017-ci ildə ali məktəblər tərəfindən AMEA-ya fundamental elmi tədqiqatlara dair 152 mühüm nəticə təqdim olunub. AMEA ilə birlikdə tədqiqat universitetinin yaradılması üçün işlərə başlanılıb". 

C.Bayramov bildirib ki, magistratura səviyyəsində təhsil alan oğlanlara həqiqi hərbi xidmətdən möhlət hüququnun verilməsi və tələbə təqaüdlərinin məbləğinin artırılması nəticəsində ali məktəblərin magistraturasına qəbul olanların sayı əvvəlki illə müqayisədə 36 faiz, qəbul olan oğlanların sayı isə 74 faiz artıb.

Nazir, həmçinin deyib ki, son illər doktorantura təhsilin təkmilləşdirilməsi üçün əhəmiyyətli işlər aparılır: "Hazırda ölkə üzrə doktorantura üzrə təhsil alan 3307 nəfərdən fəlsəfə doktoru üzrə təhsil alanların 65 faizi, elmlər doktoru üzrə təhsil alanların 50 faizi ali təhsil müəssisələrinin payına düşür. Ölkə Prezidentinin təşəbbüsü ilə reallaşdırılan "Xaricdə təhsil üzrə Dövlət Proqramı" çərçivəsində dünyanın aparıcı universitetinlərinə göndərilən 3568 nəfərin 63 faizi magistratura və doktorantura səviyyələrində təhsil alan gənclər olub".