Rafael Cəbrayılov: " Mingəçevir qəzası ciddi xəbərdarlıqdır"

Bunu BiG.AZ-a açıqlamasında deputat Rafael Cəbrayılov bildirib. 

Deputat vurğulayıb ki, bu cür qəzalardan dünyanın heç bir ölkəsi sığortalanmayıb: 

"Belə bir qəzanın baş verməsini təbii hal hesab edirəm. Amma bu qəzanın fəsadlarını, yəni respublikanın enerji təchizatının tam şəkildə kəsilməsi, iqtisadiyyatın, səhiyyə, nəqliyyat, neft-qaz sənayəsi və başqa sahələrini çox böyük maddi ziyana məruz qalması, insanlarımızın maddi və mənəvi zərər çəkməsi ilə yanaşı ölkəmizdə etibarlı enerji təchizatının mövcudluğu barədə inamının sarsıdılması anlaşılan deyil. Bundan başqa qəzanın ümumrespublika xarakteri olmasının qarşısını almaq üçün müvafiq sistemin olmaması da anlaşılması mümkün olmayan hallardandır. Bu qəzanın əsas səbəbi insan faktoru ilə bağlıdır. Bu qəza respublikanın enerji təchizatında kifayət qədər nöqsanların olmasını gündəmə gətirdi. Bu sahəyə rəhbərlik edən şəxs ilk növbədə anlamalıdır ki, belə bir məsuliyyətli sahə ölkə prezidenti tərəfindən ona tapşırılıb. Cənab prezident İlham Əliyev keçirdiyi müşavirədə də baş verən qəzanın səbəbləri və rəhbərlikdəki nöqsanlar barədə cəmiyyətin kifayət qədər məlumatlanmasına nail oldu”. 

Qeyd edək ki, iyulun 3-nə keçən gecə Mingəçevir İstilik Elektrik Stansiyasında (İES) qəza baş verib. Nəticədə stansiyanın enerji bloklarından birinin fəaliyyəti dayanıb və ölkə ərazisində ciddi enerji problemi yaranıb.