Halvanın az olduğuna əsəbiləşdi, qəbirlərə hücum çəkdi

Şəmkirdə 61 qəbirin güldanları dağıdılıb.

Bu barədə Oxu.Az-a Yuxarı Keçili kənd bələdiyyəsindən məlumat verilib. 

Məlumatda bu cür halın kənddə ilk dəfə yaşandığı bildirilib: 

"Qəbirlərin üzərindəki güldanlar yerindən qoparılıb. Güldanlar tam sınmayıb, zərbə təsirindən qopub. Qəbiristanlığa gələn sakinlər hadisədən xəbər tutduqdan sonra polisə məlumat veriblər. 

Araşdırmalar nəticəsində hadisəni törədən şəxsin ruhi xəstə olan 27 yaşlı kənd sakini Coşqun Sabir oğlu Nəcəfov olduğu müəyyənləşib. O, polislər tərəfindən şöbəyə aparılıb”, - deyə qeyd edilib.

Həmin şəxs hadisəni törətməsinə səbəb kimi martın 31-də kənddəki yas mərasimində ona verilən halvanın az olmasına əsəbiləşdiyini göstərib.

Faktla bağlı araşdırma aparılır.