İt tutan oğlan 38 gün sonra vəfat etdi

38 gün öncə itlərin hücumuna və qapmasına məruz qalan Həsənli Cavid Qəhrəman oğlu bu gün Ağstafa rayon Mərkəzi Xəstəxanasında dünyasını dəyişib.

Bizimyol.info xəbər verir ki, Ağstafa rayonu Yuxarı Göyçəli kənd sakini olan 1998-ci il təvəllüdlü Həsənli Cavid Qəhrəman oğlu bu gün səhər saatlarında dünyasını dəyişib.

Ölüm hadisəsi ilə bağlı danışan, Ağstafa rayon Mərkəzi Xəstəxanasının baş həkimi olan Vəliyeva Fatma Cavad qızı faktı təsdiqləyib və bildirib ki, onlar mərhumun ölüm səbəbini dəqiq bilmirlər:

"Səhərə yaxın rəhmətə gedib. Vallah diaqnozunu biz də dəqiqləşdirə bilmədik. Bir az şübhəmiz oldu ki, onu 38 gün qabaq it dişləməsi olub, onu da peyvəndləyiblər. İt dişləməsindən sonra deyiblər ki, sudan qorxurmuş, biz ondan şübhələnirik ki, quduzluqdan ölüb. Oğlanı qapan kəndin iti olub amma indi it hardadı bilmirik. Dünən gətirilmişdi xəstəxanaya bu gün səhər vəfat etdi. Sonra zəng edərsiniz aydınlaşdırarıq, hələ biz də heç nə bilmirik, dəqiqləşdirməmişik”.