Taleh Bağırzadənin həyat yoldaşı haqqında cinayət işi başlanıb

Həbsdə olan ilahiyyatçı Taleh Bağırzadənin həyat yoldaşı Leyla İsmayılzadə cinayət məsuliyyətinə cəlb olunur. O, həyat yoldaşına telefon keçirmək cəhdində ittiham olunaraq, barəsində cinayət işi başlanıb.

Bizimyol.info xəbər verir ki, L.İsmayılzadə sentyabrın 27-də Ədliyyə Nazirliyinin İstintaq İdarəsinə çağrılıb. İdarədə ona qarşı Cinayət Məcəlləsinin 317-1.1 maddəsilə - cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların verlməsi və ya ötürülməsinə görə ittiham elan olunacağı gözlənilir.
L.İsmayılzadə "Bizimyol.info”ya bildirib ki, müstəntiq onu idarəyə dəvət edərkən vəkilləri ilə birlikdə gəlməsini istəyib: "Dedi ki, gəlin, işi bağlayıb, məhkəməyə göndərməliyik”.
Bu maddədə cərimə cəzası və islah işlərilə yanaşı, iki ilə qədər həbs də nəzərdə tutulub.
L.İsmayılzadə özünü təqsirli bilmir. O bildirir ki, Novruz bayramı münasibətilə martın 20-də həbsxanaya həyat yoldaşının yanına gedəndə uşaq çantasından oyuncaqların arasından çıxan telefon işlək olmayıb və ora məqsədli şəkildə aparılmayıb. L.İsmayılzadənin sözlərinə görə, üç yaşlı oğlu Abbas babasına məxsus olmuş həmin telefondan oyuncaq kimi istifadə edirdi.
"Məhkum Bağırov Taleh Kamil oğlunun yanına üç azyaşlı övladları ilə birgə qısamüddətli görüşə gəlmiş arvadı, Bakı şəhər sakini İsmayılzadə Leyla Miryaqub qızı tərəfindən gətirilmiş sovqata və əşyalarına baxış keçirilən zaman uşaq çantasının içində oyuncaqların arasından 1 ədəd "Samsung” markalı mobil telefon və 1 ədəd danışıq kartı aşkar edilmişdir”, - deyə martın 21-də Penitensiar Xidmətin məlumatında bildirilirdi.
T.Bağırzadə 2015-ci il noyabrın 26-da Nardaranda keçirilən əməliyyat zamanı həbs edilib. O, Bakı Ağır Cinayətlər Məhkəməsinin hökmüylə 20 il azadlıqdan məhrum edilib.
T.Bağırzadə ona qarşı irəli sürülmüş dövlət çevrilişinə cəhd, terrorçuluq və s. ittihamlarını qəbul etmir, təqsirsiz olduğunu deyir.

www.anews.az