Müasir Azərbacan mətbuatının yaradıcısı Nəcəf Nəcəfovun ölümündən 20 il keçir

Acı bir həqiqətdir ki, Nəcəf bəy çox qısa, cəmisi 44 illik bir ömür yaşadı. Fəqət bundan daha acı həqiqət odur ki, çirkinlik və riyakarlığın paklıq və düzgünlüyə meydan oxuduğu, arxalı nadanlıq və kütbeyinliyin istedad və bacarığı hər addımbaşı üstələdiyi bir məmləkətdə xalqın ən kiçicik ağrı-acısını belə öz şəxsi faciəsi kimi yaşayan Nəcəf bəy kimi bir İNSANın bundan artıq yaşaması mümkünsüz idi.

Buna baxmayaraq, Nəcəf bəy öz qısa ömür yolu ilə sübut etdiki, Azərbaycan xalqı təkcə mənliyini bir qarın çörəyə satmağa hər dəqiqə hazır olan başabəla "ziyalılar”dan, sahibinə xoş gəlmək üçün zərrə qədər də xəcalət çəkmədən ağa qara deyən "jurnalistlər”dən, iki nəcib heyvanın arpasını bölə bilməyən "elm xadimlər”indən və s. tör-töküntülərdən deyil, həm də onun kimi sözün həqiqi mənasında patoloji dərəcədə saf və alicənab ZİYALIlardan ibarətdir. Müasir Azərbaycan cəmiyyətində barmaqla sayılası qədər az olsalar da, onlar var və həmişə olacaqlar. Deməli, Azərbaycan adlı bu məmləkətdə haqqın nahaqqı nə vaxtsa üstələyəcəyinə hələ ümid etməyə dəyər.

80-ci illərin sonunda siyasətə gəlmiş və yeganə amalı Azərbaycanın on illiklər boyunca yığılıb qalmış çoxsaylı problemlərini həll etmək istəyi olan yüzlərlə Azərbaycan ziyalısı kimi Nəcəf bəy də çox tezliklə anladı ki, çətin və mahiyyətcə qeyri-əxlaqi bir seçim qarşısında qalıb: siyasət yoxsa mənəviyyat, siyasət yoxsa insanlıq, siyasət yoxsa şəxsi azadlıq. Və böyük əksəriyyətdən fərqli olaraq, o, mənəviyyatı, insanlığı, azadlığıseçərək, NƏCƏF NƏCƏFOV olaraq qalmağa üstünlük verdi və sonadək bu seçiminə sadiq qaldı.

Nə yazıqlar ki, Nəcəf bəyin ölümü ilə Azərbaycanın əxlaqlı və vicdanlı insanlarının onsuz da sıx olmayan sıraları bir az da seyrəldi.

Qəbrin nurla dolsun, Nəcəf bəy!

 

 

Aydın Balayev