Zəngin deputat seçicilərin qarşısına 2300 manatlıq köynəklə çıxdı — FOTOLAR

"Relax” qalmaqalı ilə gündəmə gələn Lerikin deputatı İqbal Məmmədov bu dəfə namizəd olaraq çıxış etdiyi kürsüdə əks olunan SSRİ gerbi ilə diqqəti özünə yönəldib.
 
Demokrat.az-ın əldə etdiyi məlumata görə, 78 saylı Lerik seçki dairəsindən deputatlığa namizəd İqbal Məmmədovun seçicilərlə görüşdə SSRİ-nin gerbi olan tribunadan çıxış etməsi tənqidə səbəb olub. Amma həmin görüntüdə daha bir detal var ki, bu, Məmmədovun "kasıb rayonun zəngin deputatı” olduğunun aşkar göstəricisidir.
 
Lerik rayonu Azərbaycanın həm infrastruktur, həm də sakinlərin yaşayışı baxımından geridə qalan bölgələrindən hesab olunur. Amma bu rayonun sakinlərinin qismətinə zəngin deputat düşüb. Hətta o seçkilər zamanı belə seçicilərin qarşısına bahalı brend geyimlərlə çıxır. 

Elə qalmaqala səbəb olan fotodakı geyimi haqda qısa araşdırma apardıq. Məlum olur ki, İ. Məmmədovun geyindiyi köynəyin qiyməti 1500-2500 dollar arasında dəyişir. Zəngin deputat hətta bu mərhələdə belə təvazökarlıq etməyib. Aylıq gəliri aşağı-yuxarı 1500 dollar olan seçicilərin qarşısına bu qiymətə olan geyimlə çıxmaq hansı anlama gəlir, bunu yalnız İqbal Məmmədov özü deyə bilər.

www.anews.az