SOCAR-dan azərbaycanlıları işlədib pulun verməyən Kanada şirkəti ilə bağlı AÇIQLAMA

Azərbaycan Dövlət Neft Şirkəti Kanadanın "Zenith Aran Oil Company” şirkətinin 168 nəfər azərbaycanlı işçini işlədib pulunu verməməsinə dair yayılmış xəbərə münaisbət bildirib.

Anews.az-a  SOCAR-ın mətbuat xidmətindən daxil olan məlumatda bildiriblər ki, Zenith Aran Oil Company şirkəti dövlət qarşısında hasilatla bağlı üzərinə götürdüyü öhdəlikləri yerinə yetirmədiyinə görə sazişin hasilata aid olan hissəsinə xitam verilib.

Məlumatda bildirilir ki, kəşfiyyatla bağlı dövlət qarşısında olan öhdəlikləri yerinə yetirmək üçün şirkətin bu ilin avqust ayına kimi hələ müddəti var.

"Zenith Aran Oil Company şirkəti ilə hasilatın pay bölgüsü üzrə bağlanan saziş həmin şirkətin Azərbaycan dövləti qarşısında həm hasilat, həm də neft-qaz sahəsində kəşfiyyat işlərinin aparılması ilə bağlı müəyyən öhdəlikləri nəzərdə tutmuşdu. Zenith Aran Oil Company şirkəti dövlət qarşısında hasilatla bağlı üzərinə götürdüyü öhdəlikləri yerinə yetirmədiyinə görə sazişin hasilata aid olan hissəsinə xitam verilmişdir. Ancaq kəşfiyyatla bağlı dövlət qarşısında olan öhdəlikləri yerinə yetirmək üçün şirkətin bu ilin avqust ayına kimi hələ müddəti var. Şirkət də öz növbəsində həmin müddət ərzində kəşfiyyat işlərini aparmaq niyyətini bəyan edib. Buna görə sazişin hasilata aid olan hissəsinə xitam verilsə də, kəşfiyyat işlərinə aid olan hissəsi hazırda hələ qüvvədədir”, - deyə məlumatda qeyd olunur.

SOCAR-ın məlumatında o da qeyd olunub ki, Zenith Aran Oil Company Azərbaycan dövləti və vətəndaşları qarşısında özü üzərinə götürdüyü bütün öhdəlikləri, o cümlədən əmək haqqının ödənilməsi ilə bağlı öhdəliklərini yerinə yetirməlidir. Əgər yerinə yetirmirsə, zərərçəkənlər öz haqqını tələb etmək üçün qanunvericilikdə nəzərdə tutulan prosedur üzrə məhkəməyə müraciət edə bilərlər.

2016-cı il martın 16-da Azərbaycan Dövlət Neft Şirkətinin (SOCAR) və "Zenith Aran Oil Company Limited” şirkətləri arasında "Muradxanlı”, "Cəfərli” və "Zərdab” neft yataqlarının daxil olduğu blokun bərpası, kəşfiyyatı, işlənməsi və hasilatın pay bölgüsü haqqında saziş imzalanıb. Sazişi SOCAR prezidenti Rövnəq Abdullayev və "Zenith Aran Oil Company Limited” şirkətinin baş icraçı direktoru Andrea Kattaneo imzalayıblar. Sazişdə "Zenith” şirkəti 80%-lik, bütünlükdə SOCAR-a məxsus Ortaq Neft Şirkəti isə 20%-lik iştirak payına malikdirlər. Saziş 25 il müddətində qüvvədə olacaq. "Muradxanlı”, "Cəfərli” və "Zərdab” yataqları ümumilikdə 642,4 kvadratkilometr ərazini əhatə edir.

Bu günlərdə Anews.az bir qrup şikayətçi müraciət edərək bildirib ki, şirkət 3 aydır ki, onların maaşlarını vermir və bunu pulun olmaması ilə əsaslandırır.

Həzi

www.anews.az