Fermerlər üçün xüsusi sərfəli mikrokredit paketləri hazırlanıb

Fermerlər üçün xüsusi təyinatlı mikrokredit paketləri istifadəyə verilib.

Kənd Təsərrüfatı Nazirliyi yanında Aqrar Kredit və İnkişaf Agentliyindən Anews.az-a verilən məlumata əsasən, bu mikrokreditlər aqrotexniki qulluq, gübrə alışı, yem tədarükü və alışı üçün nəzərdə tutulub.

Mikrokreditlər 15 min manatadək, 1 il müddətinə və 12 faizlə verilir.

Aqrotexniki qulluq və gübrə alışı üçün nəzərdə tutulan kreditlərin güzəşt müddəti 7 aydır və bu müddətdə fermer yalnız faizləri geri ödəyir. Məhsul yığımı zamanı kreditin əsas məbləğinin yarısı birdəfəlik ödəniş kimi edilir. Növbəti 5 ayda isə qalan məbləğ və faizlər bərabər hissələrə bölünməklə geri qaytarılır.

Heyvandarların yem tədarükü və yem alışı üçün nəzərdə tutulmuş mikrokreditlərin güzəşt müddəti 6 aydır. Güzəşt müddətində yalnız kredit faizlərini ödəyən heyvan sahibi 6 aydan sonra kreditin əsas məbləğinin yarısını geri qaytarır. Növbəti 6 ayda isə qalan məbləğ və faizləri bərabər hissələrlə ödəyir.

Mikrokreditləri əldə etmək üçün fermerlərdən şəxsiyyəti təsdiq edən sənəd, Elektron Kənd Təsərrüfatı İnformasiya Sistemində qeydiyyat, torpaq sənədi və müvafiq təchizatçı ilə müqavilə tələb olunur.

www.anews.az