Vətən müharibəsi şəhidinin adına təqaüd proqramı yaradılıb

Vətən müharibəsi şəhidi Məhəmmədəli İbrahimli adına təqaüd proqramı yaradılıb. Bu təqaüd proqramı dünyanın müxtəlif ölkələrində yaşayan azərbaycanlı tələbələrin magistr səviyyəsində təhsilini dəstəkləmək üçün təsis edilib. Təqaüd proqramı azərbaycanlıların inkişaf, təhsil və parlaq gələcəyinə töhfə verməklə yanaşı, İkinci Qarabağ Müharibəsinin iştirakçısı Məhəmmədəli İbrahimlinin xatirəsini yaşatmağı da hədəfləyir.

 

Qeyd olunan proqram çərçivəsində Vişeqrad və Baltikyanı ölkələrdən birində təhsil alan və alacaq şəxslərə 2021-2022-ci tədris ili ərzində  sentyabdan başlayaraq iyuna qədər hər ay 250 avro təqaüd verilməsi nəzərdə tutulur.

 

Müraciət üçün tələb olunan sənədlər aşağıdakılardır:

1) Qəbul sənədi və ya tələbə statusunu təyin edən sənəd

 

2) Təqaüd üçün nəzərdə tutulan doldurulmuş ərizə forması

 

3) Bakalavr səviyyəsinin göstəricilərini əks etdirən akademik transkript (əgər magistr təhsilinin 2-ci ili üçün müraciət edilirsə, magistr üzrə akademik transkript də əlavə edilir)

 

4) CV

 

5) Şəxsiyyət vəsiqəsi (və ya müraciətçinin kimliyini müəyyənləşdirmək üçün hər hansı rəsmi sənəd, məsələn, xarici pasport)

 

Yuxarıda qeyd sənədlər  apply@mischolarship e-poçt hesabına göndərilməlidir. Müraciət üçün son tarix 16 iyul, saat 23:59 olaraq müəyyənləşdirilib. Bütün müraciətçilərin sənədləri qiymətləndirildikdən sonra birinci mərhələni uğurla keçmiş şəxslər müsahibəyə dəvət olunacaq. Əlavə suallar üçün mischolarship.com vebsaytına müraciət edə bilərsiniz.