Jurnalistlərin üçüncü binası ilə bağlı Prezidentə müraciət - “Şəhid ailələrinə verilsin”

Bir qrup media rəhbəri və ictimai xadim   Prezident İlham Əliyevə müraciət  edərək jurnalistlər üçün tikilən üçüncü binadakı mənzillərin şəhid ailələrinə verilməsini xahiş edib. 

 

"Biz artıq  müharibədən az bir vaxt keçməsinə baxmayaraq, olduqca böyük işlərin görülməsinə şahidlik edirik. Siz son müsahibənizdə ilin sonunadək 3 min şəhid ailəsi və qazinin mənzillərlə təmin ediləcəyini, artıq 1300 mənzilin onlara verildiyini bildirdiniz.  Biz də bu böyük missiyanın həyata keçirilməsində öz həmrəyliyimizi nümayiş etdirmək istəyirik. Məlum olduğu kimi, son illər Azərbaycan dövləti jurnalistlərin sosial vəziyyətinin yaxşılaşdırılması üçün məqsədyönlü addımlar atıb. Bunlardan biri də media nümayəndələri üçün yaşayış binalarının tikilməsi, onların dövlət hesabına mənzillərlə təmin edilməsidir.

Ötən dövrdə 500-ə yaxın jurnalist belə mənzillərlə təmin olunub. Jurnalistlər üçün nəzərdə tutulan üçüncü bina da artıq istifadəyə hazırdır. Biz təklif edirik ki, öz canından keçərək, əsl qəhrəmanlıq nümunəsi göstərərək bu Vətənin bütövlüyünü bizə bəxş edən şəhid və qazilərimizə ehtiramın ifadəsi olaraq, sözügedən üçüncü binadakı mənzillər şəhid ailələrinə, torpaqlarımızın azad edilməsində böyük şücaət göstərmiş xüsusi təyinatlılarımıza, Vətən Müharibəsi qəhrəmanlarına  təqdim olunsun", deyə məktubda bildirilir.

Məktub 38 media rəhbəri və ictimai xadim tərəfindən imzalanlb. Onların arasında BDU-nun professoru Qulu Məhərrəmli,  Yeni Nəsil jurnalistlər birliyinin sədri Arif Əliyev, ASAN radionun  rəhbəri Emin Musəvi və başqaları da var.