AXCP üzvü həbsxanada aclıq aksiyası keçirir
16.11.2021 16:13
AXCP üzvü Saleh Rüstəmov artıq 11 gündür ki, Ədliyyə Nazirliyi Penitensiar xidmətinin müalicə müəssisəsində aclıq aksiyası keçirir. Bu barədə onun vəkili Bəhruz Bayramov məlumat verib.
"Saleh Rüstəmov 11 gündür aclıq aksiyası keçirir. Buna səbəb adının icrasına başlanılan son Amnistiya Aktına düşməməsi, üç ilədək həbsdə qanunsuz saxlanılması və ailəsinə məxsus mülkün müsadirə edilməsidir", - deyə vəkil bildirib.
Bəhruz Bayramovun sözlərinə görə, bu gün o, xəstə və onun ailə üzvləri ilə görüşüb.
"Ailə üzvləri Saleh Rüstəmovdan aclığı dayandırmağı tələb edib. Təəssüf ki, istəklərinə nail ola bilməyiblər. Hazırda o həkim nəzarətindədir və bu gün yenidən müayinə olunub. Nəticədə Rüstəmovun az miqdarda sudan istifadə etdiyi məlum olub. Bu da quru aclıq kimi qiymətləndirilir və gələcəkdə böyük problemlərə səbəb ola bilər. Rüstəmova sistem köçürülməsi və dərmanlardan istifadə etmək də məsləhət görülüb”, deyə vəkil vurğulayıb.
Bakı Ağır Cinayətlər Məhkəməsi Rusiya vətəndaşı Saleh Rüstəmovun 7,3 ilmüddətinə azadlıqdan məhrum edilməsi haqqında qərar çıxarıb. O, Rusiyada qeyri-qanuni sahibkarlıqla məşğul olmaqda, gəlirlərini dövlətdən gizlətməkdə və qanunsuz yolla əldə etdiyi qazancını Azərbaycan Xalq Cəbhəsi partiyasına göndərməkdə ittiham edilib.
Saleh Rüstəmov birinci Qarabağ müharibəsi iştirakçısı və Gədəbəy rayonunun sabiq icra başçısı olub.
www.anews.az
Youtube
Bizi Youtube-da izləyin
Oxşar xəbərlər
Oxşar xəbərlər
Foto
Video
