Bakı metrosu: "Qış mövsümünə hazırıq"

"Bakı Metropoliteni” QSC qış mövsümünə hazırlıq prosesini yekunlaşdırıb.


Bu barədə Anews.az-a qurumdan bildirilib.


Məlumatda deyilir ki, qış fəslinin, əsasən qarlı-çovğunlu günləri qatarların hərəkətinin təşkil olunmasında, sərnişinlərin rahatlığının təmin edilməsində problemlər yarada bilər. Xüsusilə qarlı günlərdə "Nərimanov” elektrik deposunun açıq hava şəraitində olan yollarında çətinliklər ola, çoxsaylı yoldəyişdirici qurğuların qar altında qalması nasazlıqlara gətirib çıxara, nəticədə, depodan yeraltı yollara qatar vermək mümkün olmaya bilər.


Hazırda Bakı metrosunun qarla mübarizə qərargahı qışa hazırdır. Qərargah müvafiq avadanlıq, alət və digər materiallarla təmin olunub. İşçilər üçün xüsusi geyimlər, ayaqqabılar və digər fərdi mühafizə vasitələri alınıb. Yol təsərrüfatının qəza-bərpa sahəsi qış şəraitinə tam uyğun vəziyyətə gətirilib. Qarın yığılması üçün tələb olunan alətlər sazlanıb.


Park yollarının ərazisi yoxlanılır, müvafiq tədbirlər görülür. Xüsusən üfürücü qurğuların yerləşdiyi yerlərə davamlı baxış keçirilir, çəpərləmə ləvazimatının, alətlərin və avadanlığın vəziyyəti yoxlanılır. Depo və park yollarında izolə qovşaqları daim yoxlanılır, qüsurlu elementləri dəyişdirilir.


Stansiyalarda da qış tədarükü görülüb. Güclü qar yağıntısı və şaxtalı hava şəraiti müddətində stansiya pilləkənlərindən qarın təmizlənməsi üçün lazım olan alət ehtiyatı hazırlanıb. Pilləkənlərin buzlaşmasına qarşı hər stansiyanın ehtiyatında duz saxlanılır. Stansiya heyətinə əlverişsiz hava şəraitində, xüsusən qarın yağacağı müddətdə görüləcək işlərlə bağlı təlimatlar verilib. Bu zaman stansiya pilləkənləri nəzarətdə saxlanılacaq, sərnişinlərin hərəkəti ücün təhlükə yarada biləcək maneələr aradan qaldırılacaq. Şiddətli qar yağıntısı zamanı Qarla mübarizə qərərgahından zərurət yaranan stansiyaya təhkim olunmuş işçilər dəvət ediləcək.


Görülən işlərə əsasən, metropoliten qarlı-şaxtalı günlərdə iş ahəngini qorumağa hazırdır.


www.anews.az