Gəncədə intihara cəhd edən müəllimi təhsil şöbəsinin müdiri tapa bilmir

Gəncədə İsmət Qayıbov adına 1 nömrəli tam orta məktəbin direktoru Mətanət Qarayeva dərman içərək intihara cəhd edib. Bu barədə APA agentliyi məlumat yayıb.

 

Məlumata görə, direktor Gəncədə xəstəxanalardan birində müalicə alır və vəziyyəti kafidir.

 

DİN Mətbuat Xidmətinin Gəncə regional qrupunun baş inspektoru, polis baş leytenantı Eşqin Qasımov anews.az-a açıqlamasında bildirib ki, direktorun hansı səbəbdən intihara cəhd etməsi səbəbləri məlum deyil.

 

"Hazırda məktəb direktoru Gəncədə yerləşən xəstəxanların birində müalicə alır. Onun vəziyyətinin kafi olduğu bildirilir. Məsələ araşdırıldıqdan sonra nəticə barəsində məlumat veriləcək"-, Qasımov bildirib.

 

Gəncə şəhər Təhsil İdarəsinin müdiri Anar Qədiməliyev məsələ ilə bağlı anews.az-a açıqlamasında deyib ki, onlar xəbəri mediadan eşidiblər və hazırda həmin müəllimi axtarırlar.

 

"Hazırda həmin müəllimi xəstəxanalarda  axtarırıq. Ancaq  tapa bilmirik. Biz də xəbər saytlarından əldə etdik məlumatı"- Qədiməliyev söyləyib.

 

Hürrüyyət.az-a daxil olan məlumata görə uzun müddətdir Mətanət Qarayevanı öz ərizəsi ilə istefaya göndərmək istəyən Anar Qədiməliyev, bu niyyəti baş tutmadığı üçün bu gün səhər saatlarında direktora zəng vuraraq onu təhqir edir. Təhsil İdarəsinin müdirinin bu hərəkətindən əsəbləşən Mətanət Qarayeva iş otağındaca çoxlu sayda dərman içərək, öz həyatına qəsd etmək istəyib.

 

Gülnar Nazimqızı