“İslam Türk Tarixi” adlı ensiklopediya İstanbulda nəşr edildi

Professor Firudin Cəlilovla görüşündə fundamental əsəri ərsəyə gətirdiyinə görə təşəkkürünü bildirən Mübariz Mənsimov bildirib ki, Türk dünyasının möhkəmlənməsi, güclənməsi, inkişafı və tandılımasına xidmət edən bu cür fəaliyyətləri dəstəkləmək hər bir iş adamının Vətən qarşısında borcudur.

 

"Bir alimin mürəkkəbi min şəhid qanına bərabərdir” deyilir müqəddəs dinimizdə. Bu araşdırma, bu əsər Türkiyəyə, Azərbaycana və bütövlükdə bütün türk dünyasına sözün əsl mənasında, qiymətli bir töfhədir və mən inanıram ki, bu əsərdə toplanılmış bilgilər tarix kitablarına salınaraq övladlarımız üçün mükəmməl bir dərs vəsaitinə çevriləcək. Tarixini, keçmişini bilməyənin gələcəyi də sual altında olar. Şanlı türk tarixinə işıq saldığınıza görə sizə hər birimiz minnətdarıq”, - Mübariz Mənsimov deyib.

 

Sözügedən bu əsər yaxın vaxtlarda həm Azərbaycanda, həm də Türkiyədə elmi ictimaiyyətə təqdim olunacaq.

 

Professor Firudin Cəlilov bildirib ki, əsər üzərində 30 ilə yaxın işləyib.

 

"30 ildir Urmu nəzəriyyəsi üzərində işləyirdim. Bu əsər həmin araşdırmaların nəticəsidir. Urmu nəzəriyyəsi türklərin köçəri xalq kimi Anadoluya və Azərbaycana gəlmələrini irəli sürən baxışların yanlış olduğunu faktlarla sübuta yetirir. Üstəlik, apardığım araşdırmalar nəticəsində əminliklə və qətiyyətlə deyirəm ki, türklərin bu torpaqlarda yerli xalq olaraq 12 min illik bir dövrü əhatə edən tarixi vardır. 30 illik araşdırmalarımın nəticəsində "İslamöncəsi Türk Tarixi” adlı doqquz kitabdan (9 Bitik) ibarət bu elmi əsər ortaya çıxdı. Bu 9 kitab tarixi mənbələr, tarixi coğrafiya, Yaxın Doğuda qurulan qədim türk dövlətləri, tarixi etnoqrafiya və tarixi onomastika, ədəbiyyat və folklorda tarix, türk dili tarixi, türklərin soykökü şəcərəsi və Urmu nəzəriyyəsi mövzularını əhatə edir”, - müəlif deyib.

 

Firudin Cəlilov  türkoloq, filologiya elmləri doktoru, professor; Azərbaycan Respublikası Baş nazirinin müavini,  Azərbaycan Respublikasının Xalq təhsili naziri (1992–1993); Azərbaycan Respublikasının ali və orta ixtisas təhsili naziri olub. Təhsil naziri vəzifəsindən azad edildikdən sonra Azərbaycan Milli İstiqlal Partiyası ilə əməkdaşlığa başlamış və daha sonralar partiyanın üzvü olub və 1997-ci ildə partiyanın ikinci postu sayılan Mərkəzi Şuranın sədri və Siyasi şuranın sədri seçilib. 1998-ci ildə partiyadan ayrılıb, elmi fəaliyətinə davam edib.