DYP-dən vətəndaşlara "Anım Günü" ilə bağlı MÜRACİƏT

Bakı Şəhər Yol Polisi İdarəsi 27 sentyabr "Anım Günü" ilə bağlı olaraq vətəndaşlara II Şəhidlər xiyabanı və Dağüstü park istiqamətində maşınla az hərəkət etmələrini tövsiyə edib. Bu barədə idarənin baş inspektoru polis mayoru Araz Əsgərli anews.az-a açıqlamasında bildirib.

"27 sentyabr vətəndaşlarımızdan xahiş edirik ki, II Şəhidlər xiyabanı və Dağüstü park istiqamətinə gedərkən əsasən  ictimai nəqliyyata üstünlük versinlər. Hər iki istiqamət şəhərin mərkəzi küçələridir, parklama imkanları isə məhdud olduğu üçün sıxlığın yaşanması ehtimal olunur. Ziyarətçilər əraziyə gedərkən şəxsi minik nəqliyyat vasitələrinə üstünlük verməsinlər. Sürücülər nəzərə alsınlar ki, buraya üz tutan insanların sayı çox olacaq. Əməkdaşlarımız səhərdən axşamadək, yəni ziyarət bitənədək ərazidə, yollarda hərəkətin tənzimləmək üçün lazımi tədbirləri görəcək”, - Əsgərli söyləyib.

Prezident İlham Əliyevin sərəncamı ilə 2 dekabr 2020-ci ildən Azərbaycanda 27 sentyabr Anım Günü kimi qeyd edilir. Anım Günündə məscidlərdə dini məbədlərdə şəhidlərin xatirəsinə dualar olunur. 

 2020-ci il 27 sentyabr Azərbaycanda İkinci Qarabağ Müharibəsi kimi tarixə düşüb. Müharibə 44 gün davam edib. Nəticədə Azərbaycanın 2908 nəfər əsgəri şəhid olub. 


www.anews.az