Atalar da analar kimi pul alacaqmı?

 

Sosioloq Üzeyir Şəfiyevin fikrincə, atalıq məzuniyyətlərini ödənişli etməzdən qabaq kişilər arasında maarifləndirmə işi aparılmalıdır. 

"Kişilər məzuniyyətə çıxanda doğrudanmı uşağa  baxa biləcək və qadının gördüyü işləri görə biləcəklər? Qanunvericilikdə təkminləşdirmə işləri aparılmalıdır. Paralel şəkildə isə həm cəmiyyətdə, həm də hüquqi müstəvidə  iş aparılmalıdır. Daha sonra ödənişli şəkildə atalıq məzuniyyəti tələb edəcək məqama çata biərik”, - Şəfiyev bildirib.

Hüquqşünas  Leyla Bədəlovanın fikrincə isə,  analıq məzuniyyətinin 126 günü ödənişli olması,  atalıq məzuniyyətinin isə  ödənişsiz qalması düz deyil.

"Ananın da körpənin də qayğıya ehtiyacı var. Bu baxımdan atanın ödənişli məzuniyyətə çıxması məqsədəuyğundur. Çox vaxt atalar ödənişsiz məzuniyyət götürməkdən imtina edirlər. Buna da səbəb onların uşaq doğulduqdan sonra artan maddi ehtiyacları ödəməyə çalışmasıdır. Hüquqi cəhətdən atalıq məzuniyyətinin ödənişli  şəkildə verilməsi analıq məzuniyyətindəki kimi hesablanmalıdır. Atanın işləmədiyi günlər üçün normal maaşı verilməlidir”, -  Bədəlova bildirib.

Milli Məclisin VI çağırış deputatı Hicran Hüseynova da atalıq məzuniyyətlərinin ödənişli olmasının tərəfdarıdır. 

" Atalıq məzuniyyəti nisbətən yeni anlayışdır. Bu, analıq məzuniyyəti qədər yayılmış  olmasa da,  artıq bəzi ölkələrdə mövcuddur. Atalıq məzuniyyətindən istifadə ana və körpələrin  səhhətində yaranan fəsadların azalması,  qadının doğuşdan sonrakı ruhi sağlamlığının daha sürətli bərpası, ata ilə körpənin daha tez və möhkəm emosional bağlılığının yaranmasına müsbət təsir göstərir”,-  deputat qeyd edib.

 

Təhlillər göstərir ki, atalıq məzuniyyətinin tətbiq edildiyi ölkələrdə  ev təsərrüfatlarında əmək bölgüsü ilə bağlı münaqişələr 11%, cütlüklərin boşanma ehtimalı isə 30% azalıb.  Ataların valideyn məzuniyyətinə çıxdığı ailələrdə zorakılıq daha azdır.