Arif Hacılı sərbəst buraxılıb

Bu gün bir qrup şəxs Bakı Şəhər İcra Hakimiyyəti ilə razılaşdırılmamış aksiya keçirməyə cəhd edib. Bunu Daxili İşlər Nazirliyinin Mətbuat Xidmətinin bölmə rəisi, polis baş leytenantı Zeyni Hüseynov deyib.
 
"Cəhdin qarşısı alınıb və həmin şəxslər ərazidən uzaqlaşdırılıblar. Saxlanılan yoxdur", - DİN rəsmisi vurğulayıb.
 

 

 İranın Azərbaycandakı səfirliyi qarşısında saxlanılan Musavat partiyasının başqanı Arif Hacılı sərbəst buraxılıb. Bu barədə Anews.az-a özü məlumat verib. 

 

"Aksiyadan öncə 16 nəfərlə birlikdə bizi İran Səfirliyi yaxınlığında polis maşınına mindirərək ərazidən uzaqlaşdırdılar. İki saat şəhərdə gəzdirdikdən sonra bir-bir buraxmağa başladılar. Məni Ağ şəhər tərəfdə sərbəst buraxdılar”, - Hacılı bildirib.

 Onun sözlərinə görə, polislər daha 68 nəfərin saxlanıldığını bildirib. Amma Arif Hacılı saxlanılanların daha çox olduğu qənaətindədir.

 

Daxili İşlər Nazirliyinin Mətbuat Xidmətinin rəhbəri Elşad Hacıyev aksiya və saxlanılanlar barədə az sonra açıqlama verəcəyini bildirib.

 

Bu gün Müsavat partiyası İranın Azərbaycandakı Səfirliyi qarşısında aksiya keçirib. Aksiyanın keçirilməsində məqsədin İranda dinc nümayişçilərə qarşı amansız davranışlar və anti-azərbaycan siyasətinə etiraz olduğu bildirilib.

 

 

 Lida Abbaslı